Ҷеймс Карафано, пажӯҳишгари илмии Пажӯҳишгоҳи «EW Richardson» ва мушовири калони президенти бунёди «Heritage» дар мусоҳиба бо расонаҳои қазоқӣ назари худро дар бораи дурнамои муносибатҳои ИМА бо кишварҳои Осиёи Марказӣ баён кард.

Ба андешаи ӯ, Иёлоти Муттаҳида кишварҳои Осиёи Марказӣ ва Қафқози Ҷанубиро ҳамчун як минтақаи ягона мебинад, ки бояд тавассути Коридори Миёна (роҳи нақлиёти байналмилалии Транс-Каспий) ва Баҳри Сиёҳ ба иқтисоди ҷаҳонӣ пайваст шаванд.

«Иёлоти Муттаҳида ба ҳамкорӣ ва шарикӣ на бо диди рақобати геостратегӣ, балки бо ҳадафи ҳамгироии минтақа ба ҷомеаи иқтисодии васеътар, ки ИМА низ дар он саҳм дорад, манфиатдор аст», — мегӯяд Ҷеймс Карафано.

Ба гуфтаи коршинос, авлавияти Вашингтон дар соҳаҳои энергетика, истихроҷи захираҳои табиӣ, логистика ва сармоягузорӣ хоҳад буд. Ӯ таъкид мекунад, ки бо оғози истифодаи "реакторҳои модулӣ ва хурди насли нав" талабот ба уран босуръат афзоиш хоҳад ёфт. Ба ҳамин далел, ИМА мехоҳад ба бахши истихроҷи маъдан дар кишварҳои хориҷӣ сармоягузорӣ намояд.

«Вашингтон мехоҳад шумораи кишварҳои мустақили содиркунандаи маводи хом дар бозор бештар шавад. Қазоқистон дар оғози занҷираи арзиш қарор дорад — яъне бахши камфоида, ки танҳо ба истихроҷи захираҳо (уран ва унсурҳои нодир) маҳдуд мешавад. Барои афзоиши арзиши иловагӣ, коркард ва имкони содироти маҳсулот зарур аст», — шарҳ дод ӯ.

Ӯ эҳтимоли интиқоли технологияҳои пешрафтаи амрикоӣ барои коркарди маъдан ба Қазоқистонро рад накарда, афзуд: «Ман фикр намекунам, ки ин ғайриимкон аст. ИМА бояд ба дигар истеҳсолкунандагони минтақавӣ таваҷҷуҳ кунад ва чанд созишнома имзо намояд, ки ба коркарди маъдан дар кишвари шумо иҷоза диҳад».

Ин коршинос гуфт, ки ҳамкорӣ бо Қазоқистон аз лиҳози иқтисодӣ судманд хоҳад буд, зеро ҳар қадаре ки коркард ба манбаъ наздиктар бошад, занҷираи таъминот самараноктар ва фоида барои ҳамаи иштирокчиён бештар мешавад.

«Ман ҷонибдори он ҳастам, ки коркард бояд дар наздикии манбаи хом сурат гирад. Инфраструктура ва коркарди маҳаллӣ моро ба шарикони стратегӣ ва арзишманд табдил медиҳад», — гуфт Карафано.

Dialog.tj