Доналд Трамп, президенти Амрико бо нашри як паём хашми худро нисбат ба номзад шудани як шахси мусалмони ҷонибдори Фаластин дар интихоботи раиси шаҳри Ню-Йорк баён кард.

Президенти Амрико бо нашри паём дар шабакаи иҷтимоии фейсбук навишт, ки “ниҳоят он рӯй дод. Демократҳо аз хатти сурх гузаштанд. Заҳрон Мамданӣ, як девонаи сад дар сад коммунист, ба тозагӣ дар интихоботи ибтидоии демократҳо пирӯз шуд ва дар роҳи раиси шаҳр шудан қарор дорад”.

“Ман қаблан чапгароёни радикалро дида будам, аммо ин дигар мазҳака шудааст. Ӯ даҳшатнок ба назар мерасад, овозаш хашин аст ва чандон зирак нест”- зикр намуд Доналд Трамп.

Президенти Амрико дар ин навиштаи худ чунин илова намуд: “Се узви шурои шаҳр ва се аблаҳ аз ӯ ҳимоят мекунанд, ҳатто сенатори бузурги фаластинии мо, Чак Шумери гирён низ дар баробараш сар фурӯд меоварад. Бале, ин як лаҳзаи бузург дар таърихи кишвари мост”.

Ёдовар мешавем, ки Заҳрон Мамданӣ, номзади сотсиалист ва ҷонибдори Фаластин дар интихоботи ибтидоии раиси шаҳри Ню-Йорк бар номзади рақиби худ Андрей Куомо, раиси пешини иёлоти Ню-Йорк пирӯз шуд.

Заҳрон Мамданӣ агар дар интихоботи раиси шаҳри Ню-Йорк номзади ҷумҳурихоҳонро шикаст диҳад, аввалин раиси шаҳри мусалмони Ню-Йорк дар таърихи Амрико хоҳад шуд.

Ӯ дар изҳори назари тоза гуфт, ки агар раиси шаҳри Ню-Йорк интихоб шавад, Бенямин Нетаняҳуро дар вақти вуруд ба шаҳри Ню-Йорк бар асоси ҳукми додгоҳи ГААГА боздошт хоҳад кард.

Dialog.tj