Президенти Амрико Доналд Трамп гуфт, ки ҳавопаймоҳои амрикоӣ ба се муассисаи атомии Эрон – Натанз, Фарду ва Исфаҳон ҳамлаи муваффақиятомез анҷом доданд.

Ӯ афзуд, "ҳавопаймоҳои амрикоӣ баъди ҳамла дар роҳи бозгашт ҳастанд ва акнун замони сулҳ аст". “Мо ҳамлаҳои муваффақонаи худро ба пойгоҳҳои Фарду, Натанз ва Исфаҳон ба анҷом расонидем. Ҳамаи ҳавопаймоҳо феълан фазои Эронро тарк кардаанд” – гуфт Доналд Тармп. Доналд Трамп иддао кард, ки ҳич артиши дигар наметавонист чунин амалиётро анҷом диҳад. “Акнун вақти сулҳ фаро расидааст” – гуфт Доналд Трамп. Президенти Амрико бо вуҷуди ҳушдорҳо дар хусуси густариши ҷанг ва фоҷеаи атомӣ ба муассисаҳои атомии Эрон ҳамла кард.

Ӯ дар паёме дар шабакаи иҷтимоии "Truth Social" навишт, ки дар бораи ин амалиёт суханронӣ хоҳад кард. “Ин як лаҳзаи таърихӣ барои Иёлоти Муттаҳида, Исроил ва ҷаҳон аст. Эрон бояд ҳоло ба хотима бахшидан ба ин ҷанг розӣ шавад”- навишт Доналд Трамп. Дар ҳамин ҳол, расонаҳои ғарбӣ гузориш доданд, ки дар ин ҳамла аз ҳавопаймоҳои низомии B-2 истифода шудааст. Вокунишҳо ба ҳамлаи Амрико ба муассисаҳои атомии Эрон оғоз шуд. Неруҳои мусаллаҳи Яман гуфтанд, ки “Амрико бояд аз ҷанги мустақим бо Эрон худдорӣ кунад.” Томас Мэсси, намояндаи ҷиноҳи ҷумҳурихоҳ дар Маҷлиси намояндагон навишт, ки “ин ҳамла мутобиқ бо Қонуни асосии Амрико нест”.

Сара Ҷейкобс, вакили демократ аз иёлоти Калифорния низ дар "Х" навишт, ки “ҳамлаи Трамп на фақат мухолифи қонуни асосӣ аст, балки метавонад шиддати вазъро бештар карда, Иёлоти Муттаҳидаро ба як ҷанги бемаънӣ ва марговари дигар ворид созад”. Ба иттилои расонаҳои Исроил соатҳо қабл аз ҳамла Бенямин Нетаняҳу ва Доналд Трамп дар як гуфтугӯи телефонӣ масоили вобаста ба ҳамларо баррасӣ кардаанд. Мақомот ва расонаҳои исроилӣ гузориш доданд, ки неруҳои мусаллаҳи режими Исроил дар ҳолати омодабош қарор гирифтаанд. Сухангӯи артиши Исроил эълон кард, ки ҳамаи фаъолиятҳои омӯзишӣ ва гирдиҳамоиҳо дар ҷойҳои ҷамъиятӣ то замони муайян манъ карда мешавад. Қабл аз ҳамлаи Амрико Аббос Ироқчӣ, Вазири корҳои хориҷии Эрон ба расонаҳо гуфта буд: “Агар Амрико ба таври фаъолона вориди ҷанг бо Исроил шавад, оқибатҳои он барои ҳама хатарнок хоҳад буд”.

Dialog.TJ