Эмомалӣ Раҳмон, Президенти Ҷумҳурии Тоҷикистон ва Рустами Эмомалӣ, раиси шаҳри Душанбе субҳи имрӯз маркази нави ташхису табобат ва таълимии Донишгоҳи миллии Тоҷикистонро ифтитоҳ намуданд.

Ин иншооти муосир, ки дар шаҳраки донишҷӯён воқеъ аст, барои таҳкими робитаҳои илм ва амал дар бахши тибби кишвар бунёд шудааст.

Марказ дар доираи омодагиҳо ба ҷашни 35 – солагии Истиқлоли давлатӣ ва дар партави сиёсати маорифпарваронаи давлат бунёд шуда, дар масоҳати умумии қариб як гектар доман паҳн кардааст. Бинои панҷошёна бо таҳхонааш беш аз 3600 метри мураббаъро фаро гирифта, бо дастгоҳҳои пешрафтаи ташхиси тиббӣ, аз ҷумла томографияи резонанси магнитӣ, ташхиси ултрасадо ва озмоишгоҳҳои муҷаҳҳаз таъмин шудааст.

Ба гуфтаи масъулон Марказ метавонад дар як вақт то 300 донишҷӯ, омӯзгор ва шаҳрвандонро бо хидматрасонии тиббии босифат фаро гирад. Иншоот ҳамчунин, дорои дорухонаи гиёҳдармонӣ, озмоишгоҳи тайёркунии маводи доруворӣ ва ҳашт синфхонаи дарсӣ аст. Дар ошёнаҳои болоӣ утоқҳои табибони ихтисосманди соҳаҳои гуногун, аз гинеколог то асабшинос ҷой дода шудаанд.

Президенти кишвар зимни боздид аз Марказ аз сатҳи баланди сохтмон ва таҷҳизоти он изҳори қаноатмандӣ намуда, масъулинро ба таълиму тарбияи насли наврас дар руҳияи илмомӯзӣ ва тибби башардӯстона ҳидоят намуданд.

Марказ ҳамчун пойгоҳи таҷрибавӣ ба факултетҳои тиббӣ, фарматсевтӣ, химия ва биологияи ДМТ хидмат хоҳад кард ва умед аст, ки барои боло бурдани сатҳи касбии мутахассисони ҷавон мусоидат намояд.

Dialog.tj