Эмомалӣ Раҳмон, президенти Тоҷикистон имрӯз, 17-уми июн дар ҳошияи нишасти дуюми Осиёи Марказӣ ва Чин бо Си Ҷинпин,  президенти Ҷумҳурии Мардумии Чин дар шаҳри Остонаи Қазоқистон мулоқот анҷом дод.

Ҷонибҳо дар ҷараёни мулоқот масъалаҳои рушди робитаҳои дуҷониба ва дурнамои густариши ҳамкориҳои стратегиро баррасӣ карданд. Эмомалӣ Раҳмон аз сафари соли гузашта ва таърихии Си Ҷинпин ба Тоҷикистон ёдовар шуда, гуфт, ки он марҳилаи нави шарикии ҳамаҷонибаи стратегӣ аст.

Си Ҷинпин саҳми Тоҷикистонро дар ташаббусҳои байналмилалӣ дар бахши ҳифзи захираҳои об ва иқлим, аз ҷумла ташкили нахустин Конфронси байналмилалӣ оид ба ҳифзи пиряхҳо баланд арзёбӣ намуд. Ӯ таъкид кард, ки Чин омода аст рушди Тоҷикистонро дар бахшҳои калидӣ, аз ҷумла саноат, инфрасохтр ва иқтисодиёти рақамӣ ҳамаҷониба дастгирӣ кунад.

Сарони ду кишвар ҳамчунин, рушди ҳамкориҳои иқтисодию тиҷоратиро баррасӣ карданд. Ба гуфтаи президент Си Ҷинпин кишвари Чин дар сохтори савдои хориҷии Тоҷикистон беш аз 20 фоиз саҳм дорад. Дар ин замина, аҳамияти таъсиси корхонаҳои муштарак бо сармояи чинӣ, аз ҷумла дар бахши мошинсозии барқӣ, панелҳои офтобӣ, дорусозӣ ва саноати химиявӣ таъкид шуд.

Ҳамчунин, ҷонибҳо таъсиси марказҳои муштараки технологӣ ва IT-платформаҳоро яке аз самти ҳамкориҳои ояндадор шумурданд. Дар робита ба соҳаҳои маориф, тандурустӣ ва фарҳанг низ гуфтугӯ сурат гирифт. Аз ҷумла, афзоиши бурсияҳо барои донишҷӯёни тоҷик ва баргузории Рӯзҳои фарҳанги Чин дар Тоҷикистон пешниҳод шуд.

Дар мулоқоти сарони ду кишвар санадҳои муҳимми ҳамкорӣ ба имзо расид, аз ҷумла:

Созишнома оид ба ҳамкорӣ дар бахши моликияти зеҳнӣ;

Барномаи ҳамкории иқтисодӣ то соли 2030;

Ёддошти тафоҳум дар бораи таъсиси муколамаи стратегӣ миёни вазоратҳои корҳои хориҷӣ;

Созишнома дар соҳаи зеҳни сунъӣ ва инноватсияҳои рақамӣ;

Ҳамкории расонаӣ миёни “Народная газета” ва корпоратсияи давлатии Чин;

Созишнома оид ба бародаршаҳрӣ миёни вилояти Суғд ва музофоти Шэнси.

Dialog.tj