Шамшод Аҳмадхон, муовини пешини Вазири корҳои хориҷии Ҷумҳурии Исломии Покистон дар суҳбат бо расонаҳои эронӣ гуфт, ки ҳадафҳои режими Исроил нисбат ба Эрон амалӣ нахоҳад шуд ва Теҳрон ба душмани таҷовузкор сабақи таърихӣ хоҳад дод.

Ӯ бо ишора ба ҳамлаҳои Исроил ба хоки Эрон гуфт, яке аз ҳадафи ин ҳамлаҳо нобуд кардани муассисаҳои атомии Эрон буд, аммо ин муассисаҳо дар умқи замин мавқеъ доранд ва бо ҳамлаҳои мушакӣ имкон надорад, ки онҳо нобуд шаванд.

“Ҳадафи дуюми ин ҳамлаҳо тағйири низоми Эрон аст, аммо аҳамияти махсус ин аст, ки мардуми Эрон дар баробари режими Исроил муттаҳид шуда, аз ҳокимияти худ ҳимоят кардаанд. Тағйири низоми Эрон ғайримумкин аст ва мардуми Эрон ба даъватҳои мақомҳои Исроил таваҷҷуҳ намекунанд, балки баръакс эҳтимолияти ғазаби мардумӣ бар зидди ҳукумати Исроили ишғолгар вуҷуд дорад”- афзуд Шамшод Аҳмадхон.

Шамшод Аҳмадхон, ки қаблан ҳамчун намояндаи Покистон дар Созмони Милали Муттаҳид ифои вазифа карда буд, гуфт Иёлоти Муттаҳидаи Амрико боз хатои муҳосиботӣ кард:

“Амрико ин ҳамларо ба воситаи Исроил анҷом дод. Қабл аз расидан ба созиш, ин амалиётро ба ҳайси василаи фишор истифода кард, бидуни он ки ҳадди ақал фикре дар хусуси вокуниши Эрон дошта бошад.

Эрониҳо мардуми шуҷоъ ҳастанд ва албатта, дарси сахт ба Исроил медиҳанд. Ҳоло Эрон ҳуқуқи комил барои посух доданро дорад ва дар қарори худ пурра озод аст”- гуфт Шамшод Аҳмадхон.

Ӯ афзуд, ки пас аз хориҷ шудани Амрико аз созишномаи атомӣ, ҷиноятҳои нави Исроил ва нақзи ваъдаҳо барои бардоштани таҳримҳо эҳтимол дорад, ки Эрон низ аз созишномаи «NPT» хориҷ шавад.

Шамшод Аҳмадхон дар бораи талошҳо барои оташбас гуфт, ки аз кишварҳои минтақа ҳеч интизор надошта бошед.

“Дар сафари охири Трамп ба кишварҳои соҳили Халиҷи Форс равшан буд, ки ӯ бо тиҷорат машғул аст. Ӯ на сиёсатмадор аст ва на дипломати касбӣ, балки як соҳибкор ва казинобоз аст, ки ҳар ҷо манфиаташро мебинад, ҳамон ҷо амал мекунад. Аз ин рӯ, Трамп ба ҳеч ваҷҳ қобили эътимод нест ва аз шоҳзодагони араби минтақа низ ҳеч интизоре набояд дошт”- таъкид кард Шамшод Аҳмадхон.

Ин дипломати кӯҳнакори покистонӣ афзуд, пас аз ҳамлаи ҷавобии Эрон лафзи Трамп тағйир ёфт, ҳоло дар бораи дипломатия ва оташбас сухан мегӯяд, ҳатто ҳаракатҳои Чин ва Русия низ мушоҳида мешавад. Кишварҳои муттаҳиди Амрико, ба мисли Британияи Кабир, Фаронса ва Олмон низ таъкид доранд, ки масъала бояд ба воситаи дипломатия ҳал шавад, зеро Исроил зарарҳои ҷиддӣ дида истодааст.

“Эрониҳо ҳар ҷо хоҳанд ҳамла мекунанд ва кишварҳои ғарбӣ фаҳмидаанд, ки низоми дифоии Исроил наметавонад бар зидди дронҳои эронӣ муқовимат кунад. Агар ҳамлаҳо идома ёбад, буҳрони нафт дар ҷаҳон ба вуҷуд хоҳад омад, ки ин боиси шокҳои иқтисодӣ дар кишварҳое, ба мисли Аврупо, Ҷопон ва Чин хоҳад шуд”- афзуд Шамшод Аҳмадхон.

Ӯ илова кард, ки таҳдиди Исроил танҳо бар зидди Эрон нест, балки Покистон низ дар хатари ҷиддӣ қарор дорад: “Мардуми мо ҳамеша барои чунин таҳдидҳо омодаанд ва мо ягон имкониятро аз даст нахоҳем дод. Ҳоло вақти он расидааст, ки ҳама барои муқобила бо ин таҳдид муттаҳид шавем.

Мардуми Покистон бо тамоми ҳастии худ дар канори Эрон истодаанд ва мо ҳукумати Покистон низ ҳамбастагии худро бо Эрон ошкоро эълон мекунем. Исроил танҳо барои Эрон таҳдид нест, балки хатари ҷиддӣ барои Покистон мебошад” – таъкид кард Шамшод Аҳмадхон

Dialog.tj