Раиси шаҳри Кирмоншоҳи Эрон дар мулоқот бо муовини раиси шаҳри Душанбе пешниҳод кард, ки миёни шаҳрҳои Кирмоншоҳ ва Душанбе муносибатҳои расмии “хоҳаршаҳрӣ” барқарор шавад. Ӯ гуфт, ки ин иқдом метавонад заминаи густариши ҳамкориҳои фарҳангӣ, шаҳрсозӣ ва иқтисодии миёни ду кишварро суръат бахшад.

Дар мулоқоти ҳайати мақомоти ҳокимияти иҷроияи шаҳри Душанбе бо сарварии муовини раиси шаҳр Одилзода Дилбар Раҳим бо Нодир Наврӯзӣ, раиси шаҳри Кирмоншоҳи Эрон масъалаи таҳкими робитаҳои дуҷониба мавриди баррасӣ қарор гирифт.

“Мо дар Душанбе ба ҳамкорӣ бо шаҳрдории Кирмоншоҳ тамоюли ҷиддӣ дорем ва шуморо ба сафари расмӣ ба Тоҷикистон даъват мекунем, то заминаи ин ҳамкорӣ васеътар шавад”- гуфт Одилзода Дилбар.

Ӯ афзуд, ки шаҳри Душанбе яке аз марказҳои муҳимми адабӣ дар Осиёи Марказӣ ба шумор меравад ва бо шавқ баргузории ҷашнвораи байналмилалии “Шоҳномахонӣ ва наққолӣ” дар Кирмоншоҳро пайгирӣ кардааст. Ӯ гуфт, Тоҷикистон омодааст дар ин замина низ ҳамкориҳои фарҳангиро ба роҳ монад.

Одилзода Дилбар, муовини раиси шаҳри Душанбе ҳамчунин, аз баргузории форуми сармоягузорӣ дар ояндаи наздик дар Тоҷикистон хабар дода, раиси шаҳри Кирмоншоҳро барои ширкат дар он даъват намуд.

Нодир Наврӯзӣ, раиси шаҳри Кирмоншоҳ бо ишора ба “дипломатияи шаҳрӣ” дар густариши муносиботи давлатҳо гуфт: “Шоҳнома яке аз нуқтаҳои муштараки фарҳангии мост, ки метавонад заминасоз барои рушди равобити созанда бошад”. Ӯ пешниҳод кард, ки шаби фарҳангии муштарак миёни Кирмоншоҳ ва Тоҷикистон баргузор гардад, то робитаҳои фарҳангӣ ба таври амалӣ ва густурда идома ёбад.

Дар фарҷоми мулоқот Дилбар Одилзода туҳфаи расмии раиси шаҳри Душанбе Рустами Эмомалиро ба раиси шаҳри Кирмоншоҳ тақдим намуд.

Dialog.tj