Доналд Трамп, президенти Амрико рӯзи шанбе, 7-уми июн бо имзои фармоне 2000 сарбози Гвардияи миллиро барои саркӯб ва фурӯ нишондани эътирозҳои мардумӣ ба шаҳри Лос-Анҷелес фиристод.

Эътирозҳо дар шаҳри Лос-Анҷелес пас аз он сурат гирифт, ки Идораи муҳоҷират ва гумруки Амрико амалиёти шадидро бар зидди муҳоҷирони ғайриқонунӣ оғоз намуданд. Ин эътирозҳо рӯзи ҷумъа шакл гирифт ва дар натиҷа дар миёни эътирозгарон ва маъмурони федералӣ бархӯрд ба вуҷуд овард. Дар посух ба бетартибиҳои эътирозгарон мақомоти полис аз тирҳои резинӣ ва таркандаҳои садоӣ истифода намуданд. Дар ҳодисаҳои ахири эътирозӣ дар Лос-Анҷелес 44 нафар боздошт шудаанд.

Доманаи эътирозҳо субҳи сешанбе ба шаҳрҳои канории Лос-Анҷелес, аз ҷумла Парамаунт, ки аксари сокинонаш лотинизабон мебошанд, низ паҳн гардид.

Доналд Трамп дар формони худ навишт: “Эътирозҳо, ки иҷрои қонунҳои муҳоҷиратро халалдор мекунанд, шӯриш бар зидди ҳукумати Амрико мебошад”. Ӯ афзуд, ки неруҳои Гвардияи миллӣ муваққатан барои “ҳифзи кормандони ICE ва дигар сохторҳои федералӣ, ки вазифаҳои ҳукуматиро иҷро мекунанд”, ворид карда мешаванд. Ин неруҳо барои 60 рӯз дар он ҷо ҳузур меёбанд.

Гэвин Нюсом, губернатори Калифорния ба фармони Трамп вокуниши шадид нишон дода, ӯро диктатор номид. Ӯ фармони Трампро “қасдан таҳрикдиҳанда” номид. Гэвин Нюсом гуфт, ки ҳукумат Гвардияи миллиро “на бо сабаби камбуди маъмурони амниятӣ, блаки барои намоиши сиёсӣ” ба кор мегирад. Ӯ ба эътирозгарон хитоб намуда, гуфт: “Ба онҳо намоиш надиҳед. Ҳеч гоҳ ба зӯроварӣ роҳ надиҳед. Мухолифати худро бо роҳи осоишта баён кунед”.

Ӯ шоми 8-уми июн ба вазири дифои Амрико Пит Ҳегсет нома фиристода, талаб кард, ки фармони ворид кардани неруҳо бекор карда шавад. Ӯ гуфт, ки ин минтақа то дахолати Трамп мушкиле надошт ва ҳузури Гвардияи миллӣ “нақзи соҳибихтиёрӣ ва таҳрикдиҳандаи низоъ” мебошад.

Ин ҳолати нави низоъ дар миёни ҳукуматҳои федералӣ ва иёлатҳои мухолиф дар Амрико, бахусус Калифорния нишон медиҳад, ки масъалаи муҳоҷират ва истифодаи неруи ҳарбӣ дар дохил як мавзуи басо баҳрбарангез боқӣ мемонад. Иштироки Гвардияи миллӣ дар шаҳрҳои бузурги амрикоӣ метавонад ба эътирозҳои бештар ва мушкилоти нав дар сатҳи ҳуқуқӣ ва сиёсӣ замина гузорад.

Камола Ҳаррис рақиби дар интихобот шикастхӯрда Доналд Трамп фавран ба ин иқдоми президенти Амрико вокуниш нишон дода, онро таҳридиҳанда хонд.

Дар пайи интиқодҳои шадиди демократҳо Доналд Трамп таҳдид кард, ки дар сурати лозим неруҳои туфангдорони дарёиро ба Лос-Анҷелес хоҳад фиристод.

Dialog.tj