Эмомалӣ Раҳмон, президенти Ҷумҳурии Тоҷикистон 9-уми июн дар доираи Конфронси сеюми СММ оид ба уқёнусҳо бо Эммануэл Макрон, президенти Ҷумҳурии Фаронса мулоқот намуданд.

Роҳбарони ду кишвар зимни мулоқот роҷеъ ба вазъи феълӣ ва дурнамои робитаҳои Тоҷикистону Фаронса табодули назар карда, ба густариши ҳамкориҳои дуҷониба дар бахшҳои муҳим таъкид намуданд.

Президенти Фаронса бо изҳори сипос аз иштироки Президенти Тоҷикистон дар конфронси байналмилалӣ нақши пешсафонаи Тоҷикистонро дар ташаббусҳои ҷаҳонӣ, бахусус дар умури вобаста ба обу иқлим муҳим арзёбӣ намуд. Эммануэл Макрон Тоҷикистонро барои доир намудани муваффақонаи нахустин Конфронси байналмилалии сатҳи баланд оид ба ҳифзи пиряхҳо табрик гуфт.

Масоили рушди ҳамкориҳо дар бахши тиҷорат, энергетика, саноат, кишоварзӣ, сармоягузорӣ, истифодаи технологияҳои муосир ва истихроҷи захираҳои табиӣ дар меҳвари музокироти ду ҷониб қарор доштанд. Ҳамчунин, ҷонибҳо ба зарурати тақвияти ҳамкориҳои фарҳангӣ, илмӣ ва сайёҳӣ таъкид намуданд.

Эмомалӣ Раҳмон аҳамияти робитаҳои байнипарлумониро ҳамчун омили муҳимми рушди муносибатҳои сиёсӣ таъкид намуданд. Сарони ду кишвар аз сатҳи равобити ду кишвар дар чаҳорчӯби созмонҳои байналмилалӣ, аз ҷумла СММ изҳори қаноатмандӣ намуданд.

Дар ҷараёни суҳбат ҳамчунин, ҳамкории муштарак дар ҳалли масъалаҳои тағйирёбии иқлим, хусусан дар чорчӯби “Даҳсолаи амал барои дастгирии илмҳои яхшиносӣ” (2025–2034) мавриди баррасӣ қарор гирифт. Сарони ду кишвар мавқеи муштарак дар таъмини амнияти минтақавию ҷаҳонӣ ва мубориза бо хатарҳои терроризм ва ифротгароиро таъйид карданд.

Президенти кишвар Эмомалӣ Раҳмон дар анҷоми мулоқот Эммануэл Макронро барои анҷоми сафари расмӣ ба Тоҷикистон даъват намуданд.

Dialog.tj