Эмомалӣ Раҳмон, президенти Ҷумҳурии Тоҷикистон дар шаҳри Нитсаи Фаронса дар чорабинии сатҳи баланди Даҳсолаи байналмилалии амал барои илмҳои яхшиносӣ (криосферӣ) солҳои 2025-2034 ширкат ва суханронӣ намуданд.

Эмомалӣ Раҳмон, президенти Ҷумҳурии Тоҷикистон таъкид намуданд, ки Тоҷикистон яке аз ташаббускорони асосии ин даҳсолаи байналмилалӣ буда, дар солҳои ахир талошҳои пайваста барои ҳалли мушкилоти вобаста ба обшавии пиряхҳо, танқисии об ва паёмадҳои тағйирёбии иқлим анҷом додааст.

Эмомалӣ Раҳмон, президенти Ҷумҳурии Тоҷикистон зимни суханронӣ чунин таъкид намуданд: “То 60 дарсади пиряхҳои Осиёи Марказӣ дар қаламрави Тоҷикистон ҷойгир буда, оби ин пиряхҳо на танҳо барои мо, балки барои тамоми минтақа аҳамияти ҳаётӣ дорад”.

Сарвари кишвар бо ишора ба обшавии бесобиқаи пиряхҳо ва таҳдидҳои он ба иқтисодиёту зиндагии мардум афзуданд, ки ин раванд ба беш аз як миллиард нафар дар минтақаҳои соҳиливу ҷазиракишварҳо то соли 2025 таъсири ҷиддӣ хоҳад гузошт.

Эмомалӣ Раҳмон дар ин ҳамоиш пешниҳоди Тоҷикистон оид ба таъсис додани Маркази ҳамоҳангсозии минтақавӣ оид ба яхшиносӣ дар шаҳри Душанберо эълом карданд. Ин марказ бо ҳамкории шарикони байналмилалӣ таъсис ёфта, ҳадафаш таҳқиқ ва ҳамоҳангсозии иқдомҳо барои ҳифзи криосфера аст.

Чорабинии муҳимми байналмилалии мазкур дар доираи Конфронси сеюми СММ оид ба уқёнус баргузор шуда, дар он роҳбарони 65 кишвари ҷаҳон, Дабири куллии СММ Антониу Гутерриш, президенти Фаронса Эммануил Макрон ва роҳбарони созмонҳои байналмилалӣ ширкат доштанд.

Маросими ифтитоҳи Даҳсолаи илмҳои яхшиносӣ бо суханронии Президенти Ҷумҳурии Тоҷикистон муҳтарам Эмомалӣ Раҳмон оғоз ёфта, пас аз он суханронии Мудири кулли ЮНЕСКО хонум Одри Азуле ва Президенти Фаронса Эммануил Макрон ба ҳусни анҷом расид.

Dialog.tj