Ихтилофи лафзии Илон Маск ва Доналд Трамп бар сари қонуни нави андоз тайи ду рӯзи ахир шиддати бештар гирифт ва ин ду нафар ҳамдигарро бо иқдомҳои дуҷониба таҳдид намуданд.

Баҳси Маск бо Трамп на танҳо баҳсҳоро дар миёни корбарони шабакаҳои иҷтимоӣ доғ кард, балки таъсири манфӣ ба рӯйи бозори саҳмия низ гузоштааст. Расонаҳо навиштанд, ки баъди баҳсҳои ахир арзиши сармояи Илон Маск 34 миллиард доллар коҳиш ёфтааст.

Рӯзи чоршанбеи ҳамин ҳафта Доналд Трамп дар мулоқот бо канслери Олмон дар Кохи сафед Илон Маскро бо лаҳни тунд интиқод кард ва гуфт: “Баъзеҳо баъди тарки ҳукумат душман мешаванд ва бархеи дигар дӯст боқӣ мемонанд.

Ман намедонам чаро чунин мешавад. Шояд ин ба синдроми ошӯфтагӣ нисбат ба Трамп рабт дорад”- зикр кард Доналд Трамп.

Доналд Трамп дар ҷараёни нишасти матбуотӣ бо Фридрих Мертс, канслери Олмон гуфт, аз мушовири пешинаш “шадидан ноумед шудааст”.

Илон Маск ба ин фавран вокуниш нишон дод ва баҳси лафзӣ шиддат гирифт.

Доналд Трамп дар посух ба Илон Маск, ки қонуни андозро “нафратовар” хонда буд, гуфт: “Осонтарин роҳ барои сарфаи миллиардҳо доллар аз буҷа, қатъ кардани кумакҳо ва қарордодҳои давлатӣ бо Илон аст”.

Маск ба ин сухани Доналд Трамп вокуниши шадид нишон дод. Ӯ навишт: “Шояд вақти таъсиси як ҳизби сиёсӣ фаро расидааст”. Ин паёми Илон Маскро Майлз Чеонг, ҳомии Маск ва фаъоли ростгаро, ки хоҳони Импичменти Трамп буд, лайк гузошт.

Ин иқдом ба ҳимояти Маск аз Трамп дар интихоботи президентӣ ишора дорад. Маск на фақат 300 миллион доллар харҷ кард, балки ба воситаи нуфузаш дар ҷаҳони иқтисод роҳро барои бозгашти Трамп ба Кохи сафед ҳамвор кард. Маск мегӯяд, бе ҳимояти ӯ Трамп интихоботро мебохт ва демократҳо назорати Сенатро ба даст намегирифтанд. Ӯ Доналд Трампро ба “ношукрӣ” муттаҳам кард.

Дар қонуни нави андози ҳукумати Трамп имтиёзи андозҳо барои мошинҳои барқӣ, аз ҷумла Tesla бекор шудааст. Маск бидуни ишора ба ин масъала мегӯяд, ки омили мухолифати ӯ афзоиши касри буҷа ва “қарзи 2, 5 триллион долларии давлат” мебошад.

Демократҳо шадидан мухолифи қонуни нави андоз мебошанд. Онҳо мегӯянд, ҳукумат ба сармоядорон мебахшад, вале буҷаҳои нафақа, хадамоти иҷтимоӣ, омӯзиш ва тандурустии қишрҳои камдаромадро коҳиш медиҳад.

Ҳукумат мехоҳад барои харидорони мошинҳои барқӣ 7500 доллар андоз ҷорӣ кунад. Ин иқдом метавонад ба Tesla, ки бо коҳиши арзиши саҳмияҳояш рӯ ба рӯ аст, зиёни ҳадди аққал - 35 миллиард доллар ворид кунад. Рӯзи ҷумъа саҳмияҳои Tesla 14 фоиз коҳиш ёфтанд. Ин нишондиҳандаи он аст, ки Маск аз ҷанҷол бо Трамп миллиардҳо зиёни молӣ дидааст.

Баҳсҳои Маск ва Трамп фақат бо масоили сиёсиву иқтисодӣ маҳдуд нашуд. Маск зикр кард, ки номи Доналд Трамп дар парвандаи Ҷеффри Эпштейн вуҷуд дорад. Эпштейн бонкирест, ки духтарони наврасро барои истисмори ҷинсӣ дар ихтиёри сарватмандон мегузошт.

“Номи Трамп дар парвандаи Эпштейн зикр шудааст ва аз ҳамин сабаб, исми дигари сарватмандон пинҳон нигоҳ дошта шудааст” - навишт Маск.

Илон Маск ҳатто навореро аз мулоқоти наздики Доналд Трамп бо Эпштейн нашр кард.

Доналд Трамп таҳдид кард, ки қарордодҳои давлатии ширкатҳои Илон Маскро қатъ хоҳад кард.

Аз даст додани ҳимояти Маск метавонад барои Трамп дар интихоботи миёндавраии Конгресс мушкил эҷод кунад. Ба вижа дар шароите, ки Маск дар шабакаи иҷтимоии “Х” аз ташкили ҳизби нав хабар дод.

Рейтерз навишт, ки дӯстон ва ҳамкорони Маск аз паёмҳои ҷанҷоли ӯ бо Трамп дар ҳайрат мебошанд. Аксарият гумон мекарданд, ки ҳамкории Маск бо ҳукумати Трамп идома меёбад.

Расонаҳо ҳамчунин, аз ихтилофи Маск ва Трамп дар мавриди NASA  хабар додаанд. Ба гуфтаи ду мақоми аршади Кохи сафед Трамп номзадии Ҷаред Айзаксони мавриди ҳимояти Маскро, бо далели гароишаш ба демократҳо, барои раҳбарии  NASA рад кард, ки ин Маскро норозӣ кард.

Қабл аз ин масъала мақомоти Кохи сафед салоҳиятҳои Илон Маск дар масъалаи кадрҳо ва буҷаро маҳдуд карда буданд. Трамп дар оғози моҳи март ба кобинааш гуфт, ки қарорҳои ниҳоиро вазирон мегиранд, на Маск.

Бо вуҷуди шиддат гирифтани ҷангҳои лафзӣ Рейтерз хабар медиҳад, ки мушовирони Кохи сафед талош мекунанд, бо як тамоси телефонӣ оташбаси муваққат миёни Маск ва Трампро барқрор кунанд. Дар ҳамин замоне, ки ин хабар нашр шуд, Трамп мушовири собиқаш Маскро “девона” ва Маск ӯро “дурӯғгӯ” номид.

Dialog.tj