Президенти Амрико Доналд Трамп ворид шудани шаҳрвандони 12 кишвар, аз ҷумла Афғонистон, Эрон ва Судон ба Амрикоро барои “масъалаҳои ҷиддии амниятӣ” ва таҳдидҳои эҳтимолӣ ба амнияти миллии ин кишвар комилан манъ кардааст.

Ҳукумати Доналд Трамп бо содир кардани як қарори иҷроӣ эълон кард, ки шаҳрвандони Эрон, Афғонистон, Судон ва Яман дигар наметавонанд ба қаламрави Амрико ворид шаванд.

Дар қарор зикр шудааст, ки ин мамнуият бо сабаби “камбудиҳои ҷиддӣ дар раванди санҷиш ва филтри амниятӣ” дар 12 кишвар, ки ин сабабҳо таҳдид ба амнияти миллӣ арзёбӣ мешавад, ҷорӣ карда мешавад.

Дар изҳороти ҳукумати Трамп зикр мешавад, ки ниҳодҳои амниятии Амрико бо арзёбиҳо кишварҳои зикршударо дар сатҳи баланди хатар аз ҷиҳати таҳдидҳои террористӣ ва амнияти миллӣ қарор медиҳанд.

Дар ин қарор ба шахсони дорои иқомати доимӣ, раводидҳои муътабар ва касоне, ки ворид шуданашон ба манфиати миллии Амрико аст, истисно пешбинӣ шудааст.

Бар асоси изҳорот ин қарор бо такя ба моддаи 212-и қонуни муҳоҷират ва шаҳрвандии Амрико қабул шудааст.

Додгоҳи олии Амрико низ ҳуқуқи президент барои ҷорӣ кардани чунин маҳдудиятҳои муҳоҷиратиро тасдиқ карда буд.

Мақомоти амрикоӣ гуфтаанд, ки бознигарии раванди филтр ва назорати амниятӣ яке аз афзалиятҳои асосии сиёсати нав барои таҳкими ҳамкорӣ бо давлатҳои хориҷӣ ва ҳифзи амнияти шаҳрвандони Амрико хоҳад буд.

Dialog.tj