Бархе манобеъ аз Кохи сафед ба расонаҳо гуфтаанд, ки Доналд Трамп дар пайи нигаронӣ аз иқдомҳои харобкоронаи Исроил бо сарвазири ин кишвар тамос гирифта ҳушдор дод, аз ҳар гуна иқдоме, ки боиси “халалдор” шудани раванди музокироти атомии Эрон ва Амрико мешавад худдорӣ кунад.

Рӯзномаҳои амрикоӣ навиштанд, ки Доналд Трамп ва баъзе аз мақомоти ҳукуматаш нисбат ба иқдомҳои ахири Исроил, ки метавонад боиси халалдор шудани раванди музокирот шавад, изҳори нигаронӣ кардаанд.

Бар асоси иттилоъ, Доналд Трамп дар тамоси телефонии ахираш ба Бенямин Нетаняҳу гуфтааст, ки “намехоҳад чизе садди роҳи ҳалли дипломатии масъалаи Эрон” шавад.

Як манбаъ аз Кохи сафед гуфтааст, ки паёми сареҳи Доналд Трамп ба Бенямин Нетаняҳу ин буд, ки “ӯ намехоҳад дар замоне ки кӯшиши ҳалли мушкилотро дорад, бо Эрон хусумат варзад”.

Доналд Трамп ба Бенямин Нетаняҳу таъкид кардааст, ки мехоҳад имкони роҳи ҳалли дипломатиро биозмояд. Дафтари матбуоти сарвазири Исроил аз изҳори назар дар ин маврид худдорӣ кардааст.

Ҳамчунин, як мақоми исроил гуфт, ки Кристӣ Ноем, Вазири амнияти дохилии ИМА, рӯзи якшанбе дар Байтулмуқаддас бо Бенямин Нетаняҳу мулоқот карда, паёми Трампро расонидааст. Дар ин паём таъкид шудааст, Исроил аз ҳар иқдоме, ки ба музокирот зарба мезанад, худдорӣ кунад.

“Ман аз сарвазири Исроил хостам, бо президенти Амрико ҳамкорӣ намояд, то итминон ҳосил шавад, ки мо бо ҳам қарори оқилона қабул мекунем. Трамп мехоҳад Нетаняҳу бо ӯ ҳамовоз бошад”- гуфт Кристи Ноем.

Дар ҳамин ҳол сухангӯи Кохи сафед гуфт, ки паёми Доналд Трамп ба Беняҳмин Нетаняҳу бисёр рӯшан буд. Трамп ба Нетаняҳу гуфтааст, ки мехоҳад бо Эрон ба созиш расад ва роҳҳои дигари пурхатарро интихоб нахоҳад кард.

Dialog.tj