Дар таҳаввулоти тоза дар хусуси музокироти атомии Эрону Амрико рӯзномаи исроилии “Исроил Ҳайом” бо истинод ба як мансабдори амрикоӣ навишт, ки ҳукумати Доналд Трамп ба Эрон лоиҳаи “созиши ибтидоӣ” –ро пешниҳод кардааст.

Мансабдори амрикоӣ гуфтааст, ки ҳукумати Доналд Трамп дар ҳоли баррасии имкони коҳиши таҳримҳои зидди Эрон дар доираи чорчӯби як созиши ибтидоӣ аст. Ин мансабдори амрикоӣ гуфтааст, ки созиши ибтидоӣ даст кашидани Эрон аз ғанисозии комили уранро таъкид мекунад.

Бар асоси гузориши рӯзномаи исроилӣ мансабдори амрикоӣ зикр кардааст, ки Вашингтон аз талаботи худ оид ба қатъ кардани ғанисозии уран аз сӯйи Эрон ақибнишинӣ нахоҳад кард.

Иброҳим Ризоӣ, сухангӯи Кумитаи амнияти миллӣ ва сиёсати хориҷии парлумони Эрон афзуд, ки агар ҳадафи Амрико фақат пешгирӣ аз дастёбии Эрон ба силоҳи атомӣ бошад, имкон дорад созиш ба даст ояд, вале ҳадаф манъ кардани комили ғанисозии уран бошад, расидан ба созиш имконпазир нахоҳад буд.

Иброҳим Ризоӣ дар суҳбат бо телевизиони “CNN” гуфтааст, ки Эрон дар ҳоли таҳияи варианти “Б” дар сурати шикасти музокироти атомӣ бо Амрико аст.

Ёдовар мешавем, ки рӯзи ҷумъа, 24-уми май даври панҷуми музокироти атомии Эрон ва Амрико дар шаҳри Руми Италия баргузор шуд. Ҳайатҳои музокиракунандаи Эрон ва Амрико гуфтугӯҳои дуҷонибаро “созанда” хонда, афзуда буданд, ки “пешрафтҳое ҳосил” шудааст.

Тибқи гузориши расонаҳо баҳси аслии Амрико ва Эрон бар сари ғанисозии уран дар дохили хоки Эрон аст. Амрико иддао мекунад, ки дастрасии Эрон ба технологияи ғанисозии уран имкони сохтани силоҳи атомӣ ба ин кишварро фароҳам мекунад. Эрон дар посух ба ин иддао гуфтааст, ки ҳеч вақт дар пайи сохтани силоҳи атомӣ нахоҳад буд, аммо ғанисозии уран ҳаққи мусаллами Эрон аст ва аз он даст намекашад.

Dialog.tj