Марко Рубио, вазири корҳои хориҷии Иёлоти Муттаҳидаи Амрико таъкид кард, ки ягона шанси ҳалли ҷанги Русия ва Украина мулоқоти рӯ дар рӯи президент Доналд Трамп ва Владимир Путин аст, ки ҳанӯз сана ва вақти баргузор шуданашро намедонад.

Марко Рубио дар суҳбат бо телевизиони “Фок нюз” гуфт, ки “айни замон сана ва вақти инро намедонам, аммо воқеан ин ягона имконият аст. Ман фикр мекунам, ки бисёре аз кишварҳо дар муҳити хусусӣ ин арзёбиро пуштибонӣ хоҳанд кард”.

Қаблан, директори масъалаҳои мубориза бо терроризм дар Шурои амнияти миллии Кохи сафед ва муовини ёвари президенти Иёлоти Муттаҳидаи Амрико Себастиан Горка гуфта буд, ки дар ояндаи наздик мулоқоти Доналд Трамп ва Владимир Путин доир мешавад.

Рӯзи панҷшанбе пас аз се сол музокироти Русия ва Украина бояд дар шаҳри Истанбули Туркия доир мегашт, ки ба рӯзи ҷумъа ба таъхир гузошта шуд. Владимир Зеленский ва Доналд Трамп интизор доштанд, ки дар ин музокирот Владимир Путин шахсан ширкат хоҳад кард. Аммо шаби чоршанбе сухангӯи Кремл Дмитрий Песков хабар дод, ки Владимир Путин дар ин музокирот ширкат нахоҳад кард ва як ҳайати русӣ дар он ширкат мекунад.

Рейтерз бо такя ба манобеаш навишт, ки Доналд Трамп дар нақша дошт, ки ба музокироти сулҳи Истанбул мепайвандад, баъдан аз ин нақша сарфи назар кард. Доналд Трамп дар пасманзари эҳтимоли мулоқот бо президенти Русия гуфт, ки эҳтимолан рӯзи ҷумъа ба Вашингтон бармегардад.

Ҳафтаи гузашта президенти Русия Владимир Путин ба ҷониби Русия пешниҳоди музокироти мустақимро бидуни шартҳои пешакӣ матраҳ карда буд.

Dialog.tj