Аббос Ироқчӣ, вазири корҳои хориҷии Ҷумҳурии Исломии Эрон ба изҳороти Доналд Трамп, президенти Иёлоти Муттаҳидаи Амрико, ки Эронро омили ноаминии минтақа муаррифӣ кард, вокуниш нишон дод.

Доналд Трамп дар мулоқот бо сарони кишварҳои араб дар шаҳри Риёз гуфт, “Эрон набояд ба силоҳи атомӣ даст ёбад” ва “бояд ҳимоят аз ҷангҳои ниёбатӣ дар минтақаро қатъ кунад”. Президенти Амрико афзуд, мехоҳад бо Эрон тафоҳум кунад, ба шарте, ки Эрон аз ҳимояти терроризм даст бардорад.

Аббос Ироқчӣ дар вокуниш ба изҳороти Доналд Трамп гуфт, ки ӯ талош мекунад Эронро омили ноамнӣ муаррифӣ кунад ва бо суол гуфт, “60 ҳазор фаластиниро дар Ғазза кӣ кушт ва оё мо омили ноамнӣ ҳастем?”

Вазири корҳои хориҷии Эрон дар суҳбат бо расонаҳои эронӣ бо ишора ба ин ки интизори доир шудани даври баъдии музокирот аст ва музокиротро пайгирӣ хоҳад кард, гуфт: “Он чӣ эшон изҳор карда, матлаби фиребкорона аст ва он чӣ дар бораи тасмими кишварҳо барои масири рушд гуфтаанд, ҳамон масирест, ки миллати Эрон бо Инқилоби исломӣ худашон барои доштани як кишвари мардумсолор, озод, мураффаҳ ва пешрафта дар пеш гирифтаанд ва ин Амрико будааст, ки бо таҳримҳо ва таҳдидҳои низомии худаш пеши пешрафти миллати Эронро гирифтааст”.

Аббос Ироқчӣ дар идомаи вокуниши худ гуфт, ки яке аз далелҳои мушкилоти иқтисодии миллати Эрон Амрико будааст, зеро онҳо хостори як низоми ҳукуматии вобаста ва ҳарфгӯшкун будаанд ва ин бо иззати миллати Эрон дар таззод аст.

“Трамп бо нодида гирифтани ҷиноятҳои Исроил Эронро ба ҳайси омили ноамнӣ муаррифӣ мекунад, ки ин дар ҳақиқат ҷо ба ҷо кардани таҳдидҳо ва як фиребкории ошкор аст. Чӣ касе 60 ҳазор нафарро дар Ғазза куштааст? Чӣ касе ба муҳити пиромунии Фаластин таҷовуз кардааст? Масоҳате, ки Исроил дар ҳамин чанд вақти ахир дар Сурия ишғол кардааст. Аз тамоми масоҳати Ғазза бештар аст. Онҳо саъй мекунанд Эронро ба ҳайси таҳдиди амнияти минтақа муаррифӣ кунанд, то таҳдидҳои аслӣ фаромӯш нашавад, аммо фикр намекунам дар ин мавзуъ муваффақ шаванд. Тарафи муқобил бидонад, ки фишори максималӣ қаблан шикаст хӯрдааст”- гуфт Аббос Ироқчӣ.

Dialog.tj