Мақомоти кишвари Туркия хабар доданд, ки мулоқоти эҳтимолии Владимир Путин, президенти Федератсияи Русия ва Владимир Зеленский эҳтимолан рӯзи 15 –уми май дар шаҳри Истанбул доир мешавад.

Владимир Путин чанде қабл гуфта буд, ки омодаи мулоқот ва гуфтугӯ дар масоили ҷанг бо президенти Украина дар Туркия аст. Ҳаракатҳои дипломатӣ нишон медиҳанд, ки мақомоти Туркия омодаи мизбонӣ аз ин нишасти бисёр муҳим мебошанд.

Тибқи иттилои расонаҳо Русия ва Украина дар остонаи доир намудани музокироти таърихӣ дар шаҳри Истанбул қарор доранд. Шаҳре, ки чун рамзи дипломатияи фаъол ва имконияти нав дар соли 4-уми ҷанги Русия ва Украина шинохта мешавад.

Дар остонаи соли 4-уми ҷанг миёни Русия ва Украина ҷаҳон шоҳиди бозсозии имкониятҳои дипломатӣ дар доираи нишастҳои рӯ ба рӯ дар Истанбул аст. Бар асоси эълони мақомот музокирот қарор аст рӯзи панҷшанбе, 15 –уми май баргузор шавад. Иқдоме, ки бисёриҳо онро яке аз қадамҳои намоён ва муҳимми дипломатӣ баъд аз оғози ҷанг медонанд.

Владимир Путин, президенти Русия баъди баргузории ҷашни Ғалаба Украинаро макони дубораи оғози гуфтугӯҳои сулҳ муаррифӣ кард ва дар вокуниш ба ин изҳорот президенти Украина Владмир Зеленский гуфт, ки интизори музокирот аст. Русия эълон кард, ки омода аст бидуни эълони шартҳои пешакӣ дар ин музокирот иштирок кунад.

Қаблан аз ин, Туркия бо ташаббусҳои муассир дар чандин маврид муваффақи иҷрои созишнома дар масъалаи қазияи Украина шудааст. Қаблан, созишномаи Долони ғалладона зери роҳбарии президенти Туркия Раҷаб Тайиб Эрдуғон ба имзо расида буд.

Туркия чун кишвари мизбон ва бозигари муҳимми стратегӣ шинохта мешавад. Кишваре, ки тавонистааст дар буҳронҳои ҷаҳонӣ нақши миёнҷигари фаъол ва муассирро иҷро кунад.

Dialog.tj