Ду ширкат пешниҳод намудаанд, бо бунёд кардани нақби зеризаминии диаметраш 10-метра Баҳри Сиёҳ ва Баҳри Хазарро ба ҳам бипайванданд. Ин пешниҳод аз сӯйи ширкати озарбойҷонии “Адог” ва бандари байналмилалии Зира матраҳ шудааст. Бар асоси ин лоиҳа нақби мазкур соҳили Баҳри Сиёҳ аз сӯйи Гурҷистон ва Русияро ба Хазар мепайвандад.

Таъкид мешавад, ки бо сабаби фарқи табиии сатҳи об дар ду баҳр, оби Баҳри Сиёҳ метавонад бе истифодаи насос ба таври худкор ба Баҳри Хазар бипайвандад.

“Ин ташаббус барои танзими тавозуни обии Баҳри Хазар равона шудааст, ки сатҳи он дар солҳои ахир бо суръати нигаронкунанда паст шуда истодааст. Ин ҳолат хавфҳои ҷиддии экологӣ, иқтисодӣ ва инфрасохториро барои кишварҳои соҳилнишин ба миён меоварад” – зикр шудааст дар пешниҳоди ширкатҳои зикршуда.

Намояндагони ширкат гуфтаанд, ки татбиқи лоиҳа бо назорати комили экологӣ ва тадбирҳои ҳифзи гуногунрангии ҳаётӣ (биомуҳит) амалӣ карда мешавад. Ширкати Адог эълон кард, омода аст, ки корҳои таҳияи асосноккунии иқтисодӣ-техникиро оғоз карда, захираҳои заруриро сафарбар намояд.

Муаллифони пешниҳод аз мақомоти давлатӣ хостаанд, ки ин ташаббус дар сатҳи давлатӣ баррасӣ гардад ва ба мақомоти салоҳиятдор супориш дода шавад ва машваратҳои ибтидоиро баргузор кунанд.

Ёдовар мешавем, ки моҳи июли соли 2024 Қосим-Жомарт Токаев дар ҳамоиши ғайрирасмии Созмонҳои давлатҳои турк даъват кард, ки барои ҳаллу фасли мушкилоти экологӣ дар Баҳри Хазар ва Баҳри Арал иқдомҳои муштарак анҷом диҳанд.

Коршиносон таъкид кардаанд, дар моҳи феврали соли 2025 мушаххас шуд, ки сатҳи оби Баҳри Хазар дар давоми 20 соли охир 2 метр коҳиш ёфтааст. Ин суръат то ҳол мушоҳида нашудааст.

Dialog.tj