Дар шаҳри Маскави Федератсияи Русия форуми ҷаҳонии “Евроосиё – қаламрави арзишҳои анъанавӣ” доир гардид, ки онро Агентии ғайридавлатии “Евроосиё” ба муносибати солгарди таъсисёбиаш баргузор кард.

Ин чорабинии сатҳи баланд беш аз 600 нафар ширкаткунандагонро аз кишварҳои мухталифи минтақаи Евроосиё гирди ҳам овард.

Форум дар Маркази миллии Русия баргузор гардид ва намояндагони сохторҳои давлатӣ, доираҳои тиҷоратӣ, соҳаи маорифу фарҳанг ва ташкилотҳои ҷамъиятиро аз 10 кишвари минтақа ба ҳам овард. Дар қатори кишварҳои иштирокчӣ Молдова, Арманистон, Қазоқистон, Тоҷикистон, Ӯзбекистон, Озарбойҷон, Абхазия, Сербия ва дигар давлатҳо номбар шуданд.

Дар доираи чорабинӣ масъалаҳои муҳимми ҳифзи ҳувияти миллӣ, таҳкими робитаҳои фарҳангӣ ва ташаккули платформаи ягонаи ҳамкории кишварҳои Евроосиё мавриди баррасӣ қарор гирифт.

Ширин Абидова, директори Ассотсиатсияи волонтёрони Ӯзбекистон дар аснои суханронӣ таъкид кард, ки ҳаракати волонтёрӣ дар кишвараш бо суръати баланд рушд карда, дар ҳалли масъалаҳои иҷтимоӣ ва дастгирии гурӯҳҳои осебпазир нақши муҳим иҷро мекунад. Ӯ гуфт: “ Мо ифтихор дорем, ки дар Ӯзбекистон сол то сол шумораи одамоне, ки ба дигарон беғаразона кумак мерасонанд, зиёд мегардад. Волонтёрон имрӯз ба як неруи мусбати ҷомеа табдил ёфтаанд”.

Дар доираи форум ҷаласаи планерии сатҳи баланд зери унвони “Евроосиё – қаламрави арзишҳои анъанавӣ”, инчунин, панел-дискуссияҳо оид ба масъалаи маориф, хотираи таърихӣ, ҳамкории иттилоотӣ ва соҳибихтёрии технологӣ баргузор гардид. Ҳамзамон, муколамаи байнифарҳангӣ дар хусуси нақши анъанаҳо дар ҷаҳони муосир низ барпо шуд.

Яке аз рӯйдодҳои муҳимми Форум эълони нахустин ҷоизаи байналмилалии “Евроосиё” буд, ки мақсади он ҳавасмандсозии лоиҳаҳо дар самти дипломатияи мардумӣ, ҳифзи мероси фарҳангӣ ва таҳкими робитаҳои байни давлатӣ аст.

Дар як соли ахир ташкилоти “Евроосиё” даҳҳо барномаро дар самти маориф, мубодилаи ҷавонон ва ҳамкории фарҳангӣ амалӣ карда, беш аз 20 ҳазор нафарро фаро гирифтааст. Самтҳои калидии фаъолияти он – пуштибонии донишҷӯён, ташаббусҳои таърихӣ, лоиҳаҳои расонаӣ ва рушди ҳамкориҳои касбӣ аст.

Dialog.tj