Тибқи иттилои Сарраёсати маорифи шаҳри Душанбе 8-уми апрел дар муассисаи таълимии хусусии «Абдураҳмони Ҷомӣ» дар доираи «Ҳафтаи илм, технология, инноватсия ва ихтироъкории наврасону ҷавонони шаҳри Душанбе» озмуни шаҳрии «Илм ва амал» баргузор гардид.

Гуфта мешавад, ки дар озмуни мазкур зиёда аз 85 лоиҳаи инноватсионӣ ва ихтироъкории хонандагони ихтироъкору навовари муассисаҳои таҳсилоти миёнаи умумии пойтахт ба намоиш гузошта шуданд. Дар натиҷа, лоиҳаҳои беҳтарин аз ҷониби ҳайати ҳакамон интихоб гардида, ғолибон дар маросими ҷамъбасти «Ҳафтаи илм, технология, инноватсия ва ихтироъкории наврасону ҷавонони шаҳри Душанбе» бо ҷоизаҳои арзанда қадрдонӣ карда мешаванд.

Зикр мегардад, ки озмуни «Илм ва амал» ба рушди ташаккули малакаҳои эҷодӣ ва рушди навоварӣ миёни наврасон замина мегузорад.

Ёдовар мешавем, ки бо мақсади баланд бардоштани сатҳу сифати таҳсил, бедор намудани шавқу рағбати хонандагон ба эҷодкорӣ, навовариву ихтироъкорӣ,  омӯзиши амиқи илмҳои дақиқ, ташаккули сатҳи фарҳанги техникӣ, тарғиби маданияти истифодаи иттилооти интернетӣ, татбиқи  техникаю технологияи инноватсионии муосир дар раванди таълим ва дастгирии ихтироъкорону навоварони наврасу ҷавон ҳамасола бо қарори раиси шаҳри Душанбе Рустами Эмомалӣ «Ҳафтаи илм, технология, инноватсия ва ихтироъкории наврасону ҷавонони шаҳри Душанбе» баргузор мегардад.

Dialog.tj