Доналд Трамп бо судури фармони ҳамла ба Яман ба Эрон ҳушдор дод, ки дар сурати ҳимояти ҳусиҳои Яман мавриди ҳамлаи Амрико қарор хоҳад гирифт. Дар вокуниш ба ин таҳдиди президенти Амрико намояндаи доимии Эрон дар Созмони Милали Муттаҳид вокуниш нишон дод.

Амирсаъид Ирвонӣ , намояндаи доимии Ҷумҳурии Исломии Эрон дар Созмони Милали Муттаҳид дар номае ба Шурои амнияти Созмон таҳдидҳои Амрико нисбат ба Эронро қотеъона рад ва маҳкум кард.

Дар номаи намояндаи доимии Эрон дар СММ Амирсаъид Ирвонӣ  таъкид мешавад, ки Эрон изҳороти душманонаи ахири мақомоти баландпояи ҳукумати Амрико, аз ҷумла президенти ин кишварро “қотеъона маҳкум мекунад”.

Намояндаи Эрон таъкид мекунад, ки ба сабаби поймолкунии ҷиддии ҳуқуқи байналмилалӣ Эрон ин “изҳороти хатарнокро қатъиян рад ва маҳкум мекунад”.

“Эрон аз Шурои амният талаб мекунад, ки мавқеи рӯшан ва принсипиалӣ дар маҳкум кардани чунин лаҳни танишзод қабул намуда, аз Иёлоти Муттаҳидаи Амрико хоҳад, ки уҳдадориҳои худро тибқи Оинномаи Созмони Милали Муттаҳид иҷро намояд” – зикр мешавад дар номаи намояндаи Эрон дар СММ.

Дар бахши дигари нома зикр мешавад, ки Эрон таҷовузи низомии ахир ва истифодаи ғайриқонунии зӯроварӣ бар зидди Яман аз ҷониби Иёлоти Муттаҳидаи Амрико ва Британияи Кабирро қотеъона маҳкум мекунад.

“Ин амалҳо нақзи ошкорои истиқлолият ва тамомияти арзии Яман буда, бар хилофи ҳуқуқи байналмилалӣ, Оинномаи СММ ва қатъномаҳои марбутаи Шурои амният мебошад ва дар натиҷа таҳдиди ҷиддӣ ба сулҳу суботи минтақа ҳисобида мешавад” - зикр шудааст дар номаи Амирсаъид Ирвонӣ .

Тайи чанд рӯзи ахир неруҳои ҳавоии Иёлоти Муттаҳидаи Амрико дар қисматҳои мухталифи Ҷумҳурии Яман ҳамлаҳои ҳавоӣ анҷом медиҳанд. Бар асоси гузориши расонаҳо, дар натиҷаи ҳамлаҳои ҳавоии Иёлоти Муттаҳидаи Амрико даҳҳо нафар ғайринизомӣ кушта шудаанд. Мақомоти амрикоӣ, аз ҷумла Доналд Трамп таҳдид карданд, ки дар сурати пуштибонии Эрон аз муборизони яманӣ, ба вокуниши ҷиддии Амрико рӯ ба рӯ хоҳад шуд. Доналд Трамп аз Эрон хост, ки аз пуштибонии гурӯҳи ҳусиҳои Яман даст бардорад.

Дар вокуниш ба изҳороти Доналд Трамп, вазири корҳои хориҷии Эрон Сайидаббос Ироқчӣ гуфт, ки Иёлоти Муттаҳидаи Амрико наметавонад сиёсати хориҷии Эронро дикта кунад. Ӯ гуфт, ки Эрон ба ҳама гуна таҷовуз ва ишғол мухолиф аст.

Dialog.tj