Дар пасманзари мавҷи маҳкумиятҳои байналмилалӣ Русия, Иттиҳоди Аврупо, Миср, Эрон, Арабистони Саудӣ, Қатар ва як қатор кишварҳои дигар дар бораи азсаргирии ҳамлаҳои Исроил ба минтақаи Ғазза вокуниш нишон доданд.

Русия бо изҳори таассуф аз оғози дубораи амалиёти низомии Исроил гуфт, ҳар гуна иқдоме, ки боиси ҳалокати ғайринизомиён гардадро маҳкум мекунад.

“Маскав бо андуҳи амиқ аз оғози дубораи амалиёти низомии Исроил дар минтақаи Ғазза огоҳ шуд ва ҳар ду ҷонибро ба бозгашт ба музокирот даъват намуд” – гуфтааст дар як баёния Вазорати корҳои хориҷии Русия.

Исмоил Бақоӣ, сухангӯи вазорати корҳои хориҷии Ҷумҳурии Исломии Эрон низ изҳор дошт, ки Амрико масъули мустақими “идомаи қатли омм дар сарзаминҳои ишғолии Фаластин” аст.

Тамим Халиф, сухангӯи Вазорати корҳои хориҷиии Миср ҳамлаҳои ҳавоии Исроилро “вайронкунии ошкорои оташбас” ва нишонаи “шиддат гирифтани таниши хатарнок” номид.

Муҳаммад Мумонӣ, сухангӯи ҳукумати Урдун гуфт, ки кишвараш аз шаби гузашта “бомбаборони таҷовузомез ва ваҳшиёнаи Исроил дар минтақаи Ғаззаро” пайгирӣ мекунад. Ӯ ба “зарурати қатъи ҳамлаҳои Исроил” таъкид кард.

Арабистони Саудӣ ҳамлаҳои ҳавоии Исроил ба “минтақаҳои пур аз ғайринизомиёни бе паноҳ”-ро, ки бе “ҳатто хурдтарин эҳтиром ба қонунҳои байналмилалии инсонӣ” анҷом дода шудаанд, шадидан маҳкум кард.

Ҳоҷа Лаҳбиб, комиссари кумакҳои башардӯстонаи Иттиҳоди Аврупо даъват кард, ки хушунатҳои навбатӣ фавран қатъ шаванд ва тарафҳо ба оташбас баргарданд. Ӯ гуфт, ки мардуми ғайринизомии Ғазза “азобҳои ғайриқобили тасаввур”-ро таҳаммул карда истодаанд.

Мақомоти тандурустии Фаластин хабар доданд, ки зиёда аз 400 нафар дар амалиёте, ки артиши Исроил онро “ҳамлаи пешгирона” бар зидди Ҳамос мехонад, кушта шудаанд.

Dialog.tj