Президенти Ӯзбекистон Шавкат Мирзиёев ва президенти Фаронса Эммануэл Макрон дар Қасри Елисей шартномаи шарикии стратегии Ӯзбекистон ва Фаронсаро имзо карданд.

Хадамоти матбуоти президенти Ӯзбекистон иттилоъ медиҳад, ки дар Қасри Елисей музокироти дуҷонибаи роҳбарони ду кишвар дар формати рӯ ба рӯ ва ҳамчунин, бо иштироки васеъи ҳайатҳо баргузор шуд. Дар ин мулоқот роҳбарони ду кишвар ба рушди ҳамкориҳои дуҷонибаи иқтисодӣ таъкид намуданд. Таъкид шуд, ки барои нахустин бор, дар соли гузашта ҳаҷми тиҷорат аз 1 миллиард евро гузашт ва шумораи корхонаҳои муштарак афзоиш ёфт. Дар ҷараёни мулоқот ба ҳамкории сармоягузорӣ ва молиявӣ таваҷҷуҳи махусус зоҳир гардид.

Дар доираи сафари Шавкат Мирзиеёв ба шаҳри Париж Барномаи шарикии инноватсионӣ ва саноатӣ ба имзо расид. Дар доираи барномаи мазкур ду кишвар барои амалӣ сохтани лоиҳаҳои муштарак 6, 5 миллиард евро сармоягузорӣ хоҳанд кард. Ин лоиҳа ба бахшҳои истихроҷ ва коркарди маъданҳои муҳим, энергетика, рушди инфрасохтор ва нақлиётӣ вобаста аст. Ба асоси иттилои расонаҳо, дар маҷмуъ лоиҳаҳои муштараки Ӯзбекистон ва Фаронса аз 12 миллиард доллар зиёдтар мебошад.

Дар доираи сафари Шавкат Мирзиёев ба Фаронса дар шаҳрҳои гуногун, аз ҷумла Париж, Тулуза, Лион, Нитса чорабиниҳои мухталиф бо иштироки ҳайатҳои Ӯзбекистон баргузор мешавад. Бар асоси нақша форуми тиббӣ ва конфронси илмӣ баргузор шуда, муаррифии имкониятоҳои сайёҳии Ӯзбекистон сурат мегирад. Ба хотири идомаи ҳамкориҳо ду ҷониб тавофуқ карданд, ки Форуми аввалини минтақавии Ӯзбекистон ва Фаронсаро дар соли 2026 баргузор намоянд.

Роҳбарони ду кишвар дар нишасти матбуотӣ таъкид намуданд, ки равобити сиёсии Ӯзбекистон ва Фаронса то ба сатҳи шарикии стратегӣ рушд хоҳад кард.

“Бо дастгирии ҳукумати Фаронса ва Агентии рушди Фаронса ширкатҳои мо дар Ӯзбекистон сармоягузорӣ мекунанд, ҷойҳои нави корӣ эҷод мешавад ва ҷавонон касб омӯхта, ҷойи худро дар зиндагӣ пайдо мекунанд” – таъкид намуд президенти Фаронса.

Dialog.tj