Дар пасманзари сафари расмии Президенти Ҷумҳурии Тоҷикистон муҳтарам Эмомалӣ Раҳмон ба Ҷумҳурии Қирғизистон Ширкати ҳавопаймоии «Сомон Эйр» хабар дод, ки парвозҳо аз аз Душанбе ба Бишкек оғоз мешаванд.

Тибқи иттилои манбаъ, парвози аввалини чартерӣ аз Душанбе рӯзи 14-уми марти соли 2025 соати 09:00, аз Бишкек соати 13:30 ба вақти маҳаллӣ муқаррар шудааст. Арзиши билети парвоз 87 евро муқаррар шудааст.

Ҳамчунин, гуфта мешавад, ки минбаъд аз 23-уми март парвозҳо миёни Душанбе ва Бишкек ҳафтае як маротиба рӯзҳои якшанбе сурат мегиранд. Вақти парвоз аз Душанбе соати 10:30 ва аз Бишкек соати 14:20 ба вақти маҳаллӣ мебошад. Давомнокии парвоз аз Душанбе ба самти Бишкек 1 соату 30 дақиқа, дар самти баргашт 1 соату 20 дақиқаро ташкил медиҳад.

Гуфта мешавад, ки барқарор шудани парвозҳои ҳавоӣ миёни Ҷумҳурии Тоҷикистон ва Ҷумҳурии Қирғизистон дар таҳкими муносибатҳои дӯстона ва робитаҳои иқтисодию фарҳангии ду кишвар саҳмгузор буда метавонад.

Ёдовар мешавем, ки имрӯз Президенти Ҷумҳурии Тоҷикистон Эмомалӣ Раҳмон ва Президенти Ҷумҳурии Қирғизистон Садир Жапаров дар маросими маҷозии бозкушоии ду гузаргоҳ дар сарҳади давлатии Тоҷикистон ва Қирғизистон иштирок намуданд.

Dialog.tj