Сарвазири Қатар Шайх Муҳаммад бинни Абдураҳмон Оли Сонӣ дар суҳбат бо рӯзноманигори маъруфи амрикоӣ Токер Карлсон гуфт, ки ҳамла ба муассисаҳои атомии Эрон боиси сар задани ҷанг дар тамоми минтақа шуда, фоҷеаи инсониро ба бор меорад.

Шайх Муҳаммад бинни Абдураҳмон Оли Сонӣ, сарвазири Қатар ҳушдор дод, ки ҳамлаи эҳтимолӣ ба муассисаҳои атомии Эрон Халиҷи Форсро “бидуни об, моҳӣ ва ҳаёт” хоҳад кард. Ӯ хостори роҳи ҳалли дипломатӣ барои пешгирӣ аз ҳамлаи низомӣ ба Эрон шудааст. Сарвазири Қатар таъкид кардааст, ки ҳамлаи низомӣ ба Эрон боиси “ҷанге хоҳад шуд, ки ба саросари минтақа густариш меёбад”.

Сарвазири Қатар бо ишора ба наздик будани муассисаҳои атомии Эрон ба Қатар, Имороти Муттаҳидаи Арабӣ ва Кувейт зикр кардааст, ки Давҳа нисбат ба Эрон наздиктар ба ин муассисаҳо ҳастанд.

“Қатар ба ҳеч ваҷҳ аз ҳеч гуна иқдоми низомӣ ҳимоят нахоҳад кард. Мо то замоне, ки ба роҳи ҳалли дипломатӣ нарасем, даст аз талош бар нахоҳем дошт” – гуфтааст сарвазири Қатар.

Шайх Муҳаммад бинни Абдураҳмон Оли Сонӣ дар ҳоле дар бораи ҳамла ба муассисаҳои атомии Эрон ҳушдор медиҳад, ки Доналд Трамп чанде қабл гуфта буд, Эрон ду гузина дар ихтиёр дорад ё музокира ё ҳамлаи низомӣ ба муассисаҳои атомиаш.

Доналд Трамп дар охирин паёмаш гуфт, ки ба роҳбари Эрон Оятуллоҳ Алии Хоманаӣ нома навишта ва хостори музокира дар хусуси барномаҳои атомии Эрон шудааст.

Dialog.tj