Иёлоти Муттаҳидаи Амрико чанде қабл дар қатори қатъи кумакҳои моливу низомӣ Украинаро аз дастрасӣ ба иттилооти моҳвораӣ маҳрум кард. Доналд Трамп мехоҳад бо таҳти фишор қарор додани мақомоти феълии ҳукумати Украина бар иловаи конҳои камёб, имтиёзҳои бештаре ба даст оварад.

Расонаҳои амрикоӣ менависанд, ки Доналд Трамп дар суҳбати ғайрирасмӣ гуфтааст, ки аз Владимир Зеленский имтиёзтҳои бештар, аз ҷумла вогузории қаламрави Украина ба Русия ва баргузории интихоботи зудҳангомро мехоҳад.

Телевизиони “НБС”-и Амрико аз қавли як мақоми амрикоӣ хабар дод, ки Доналд Трамп ба тими музокиракунандаи амрикоӣ гуфтааст, фақат созишномаи конҳои камёб бо Украина басанда нест. Ӯ гуфтааст, ки президенти Украина Владимир Зеленский барои додани имтиёзҳои бештар бояд омода бошад.

Тибқи иттилоъ, Доналд Трамп мехоҳад созишномае фаротар аз конҳои камёби Украина ба имзо расад.

Амрико хоҳони тағйири муносибати Украина ба сулҳ бо Русия, вогузор намудани қаламрави бештари Украина ба Русия ва ҳамчунин, истеъфои Владимир Зеленский аз мақоми президентӣ аст.

Дар ин ҳафта тимҳои музокиракунандаи Амрико ва Украина дар Арабистони Саудӣ бар сари масъалаҳои калидии Украина музокира хоҳанд кард. Владимир Зеленский чанде қабл гуфта буд, ки барои имзои созишномаи конҳои камёб омодааст, ба Вашингтон сафар кунад.

Сухангӯи Шурои амнияти миллии Иёлоти Муттаҳидаи Амрико Брайан Ҳюз дар посух ба суоле гуфтааст: “Бо ҷаласаҳое, ки дар Арабистони Саудӣ баргузор мешаванд, мо бо иштиёқ интизори шунидани иқдомҳои мусбат ҳастем, ки умедворем дар ниҳоят ба ин ҷанги ваҳшиёна ва хунрезӣ поён медиҳад”.

Dialog.tj