Доналд Трамп, президенти Иёлоти Муттаҳидаи Амрико дар Кохи сафед дар ҷараёни суҳбат аз президенти Украина Владимир Зеленский шадидан интиқод намуд. Доналд Трамп ба Владимир Зеленский гуфт, ки ин кораш оғоз бахшидан ба ҷанги севуми ҷаҳонӣ аст.

Владимир Зеленский, президенти Украина рӯзи ҷумъа, 28-уми феврал вориди хоки Амрико шуд ва дар Кохи сафед барои ҳалли масъалаҳои дуҷонибаи миёни ду кишвар бо Доналд Трамп суҳбат кард. Дар ин дидор ва гуфтугӯ ҳарду тараф бо ҷанги лафзӣ музокиротро оғоз намуданд ва Доналд Трамп дар ҷараёни суҳбат гуфт, ки “мехоҳад мардуми Амрико ин суҳбатро” бибинанд.

Ҷанги лафзии Доналд Трамп бо Владимир Зеленский дар муқобили рӯзноманигорон ва дурбинҳои наворбардорӣ сурат гирифт. Доналд Трамп бо лаҳни бисёр сахт ба Зеленский гуфт: “Шумо зиндагии миллионҳо нафарро ба хатар меандозед. Шумо дар ҳоли қимор бо ҷанги севуми ҷаҳон ҳастед”.

Доналд Трамп дархостҳои Владимир Зеленский дар хусуси тазминҳои амниятӣ аз Амрикоро “беэҳтиромӣ” хонд ва гуфт, президенти Украина “аслан аз Амрико қадрдон нест”. Доналд Трамп дар идомаи суҳбат гуфт: “Бо ин шева анҷом додани муомила душвор хоҳад буд”.

Доналд Трамп дар ҷараёни суҳбат борҳо сухани Владимир Зеленскийро қатъ карда ва гуфт, ки Украина бидуни ҳимояти Амрико дар муқобили Русия то ду ҳафта давом нахоҳад овард. Дар посух Владимир Зеленский гуфт, ки “Путин се рӯз” гуфта буд. Доналд Трамп бо асабоният гуфт, ки артиши Украина бо камбуди неруи инсонӣ рӯ ба рӯ аст ва дигар наметавонад дар муқобили Русия давом биёварад. Доналд Трамп бо изҳори шубҳа нисбат ба мавқеияти Украина дар муқобили ҷанг бо Русия гуфт: “Кишвари шумо дар вазъияти душворе қарор дорад. Ман медонам, ки шумо пирӯз нахоҳед шуд. Шумо ин ҷангро нахоҳед бурд. Шумо ба лутфи мо шанси бузурге доред, ки аз ин вазъият ҷони солим ба даст оваред”.

Доналд Трамп ба Владимир Зеленский ҳушдор дод, ки ё бояд созишномаи сулҳро бипазирад ва ё ин ки Амрико дар ин замина кумакҳояшро қатъ хоҳад кард.

Владимир Зеленский дар вокуниш ба суханони Трамп дастонашро рӯйи сина гузошт ва аз мавқеи кишвараш дифоъ кард. Ӯ таъкид кард, ки пас аз ҳамроҳ кардани Қрим ба Русия дар соли 2014 ҳеч кас барои боз доштани Владимир Путин талош накард.

Дар посух ба ин ҳарф Доналд Трамп гуфт, ки дар давраи аввали президентиаш ба Украина аслиҳа дод ва Зеленский аз ин бояд қадрдон бошад.

Сафари президенти Украина бидуни имзои созишнома поён ёфт. Қарор буд дар ин сафар Владимир Зеленский  ва Доналд Трамп созишнома оид ба захираҳои конҳои ноёби Украинаро имзо кунанд.

Вазири хориҷаи Иёлоти Муттаҳидаи Амрико гуфт, ки президенти Украина Владимир Зеленский бояд барои содир намудани чунин амали хашин аз Амрико узрпурсӣ кунад.

Dialog.tj