Доналд Трамп, президенти Иёлоти Муттаҳидаи Амрико таҳримҳои зидди Русияро, ки солҳои 2014, 2018 ва 2022 ҷорӣ шуда буданд, барои як сол тамдид кард. Тибқи иттилоъ дар ин маврид ҳанӯз ҳуҷҷат нашр нашудааст, вале он аллакай дар махзани иттилоотии Феҳристи федералии ИМА ҷой дода шудааст.

Қаблан, президенти Амрико Доналд Трамп ва вазири корҳои хориҷии ин кишвар Марко Рубио гуфта буданд, маҳдудиятҳои зидди Русия то замоне, ки созишномаи поёни ҷанги Украина ба даст наояд, бекор карда намешавад.

Таҳримҳо бар зидди Русия пай дар пай бо фармонҳои президентҳои ИМА Барак Обама дар соли 2014, Доналд Трамп дар соли 2018 ва Ҷо Байден дар соли 2022 амалӣ шуданд. Сабаби нахустини таҳримҳо ворид шудани Федератсияи Русия ба минтақаи Қрими Украина буд.

“Амалу сиёсати зикршуда дар ин фармонҳо то ҳол таҳдиди ғайриоддӣ ва фавқулода ба амнияти миллӣ ва сиёсати хориҷиии ИМА ба шумор мераванд” – гуфта шудааст дар ҳуҷҷати зикршуда.

Таъкид шудааст, ки пас аз ҷаласаи аввали ҳукумати ИМА дар Кохи сафед Доналд Трамп гуфт, ки танҳо баъди анҷоми низоъ дар Украина омода аст таҳримҳоро бекор кунад.

“Ман мехоҳам аввал бубинам, ки оё мо метавонем ба созиш бирасем” – гуфт ӯ.

Ҳафтаи гузашта Иттиҳоди Аврупо бастаҳои нави таҳримҳоро бар зидди Русия ҷорӣ кард.

Ин дар ҳолест, ки тайи ду ҳафтаи гузашта мақомоти Иёлоти Муттаҳидаи Амрико ва Федератсияи Русия барои расидан ба созиш дар масъалаи ҷанги Украина гуфтугӯ мекунанд. Нахустин даври музокироти ду кишвар дар Арабистони Саудӣ бо ширкати Сергей Лавров, вазири корҳои хориҷии Федератсияи Русия ва Марко Рубио, вазири корҳои хориҷии Иёлоти Муттаҳидаи Амрико доир гашт. Ҳар ду тараф музокиротро созанда хонда, барои идомаи он таъкид карданд. Ҳайатҳои ду ҷониб дар пайи онанд, ки мулоқоти Доналд Трамп ва Владимир Путин баргузор шавад.

Доналд Трамп дар охири изҳороташ гуфт, ки бояд ҷанги Украина хотима дода шавад ва ин кишвар узви НАТО нахоҳад шуд.

Dialog.tj