Намояндагони Ҳамос чор ҷасади кушташудаи асирони исроилиро ба Салиби Сурх супорид. Дар пайи ин Исроил чандин асири фаластиниро озод кард.

Тибқи иттилои расонаҳо ҷасадҳо ба гузаргоҳи марзии Керем-Шалом интиқол дода шуданд. Ҳамзамон корвони автобусҳо бо маҳбусони фаластинии озодшуда ба шаҳри Рамаллоҳ, соҳили ғарбии дарёи Урдун расид.

Маълум нест, ки дар ин шаб чандин фаластинӣ озод шудааст ва оё дар ин шумора ҳамаи 602 маҳбусе, ки мебоист рӯзи шанбе дар ивази шаш гаравгони зиндамондаи исроилӣ озод карда мешуданд, дохил мешавад ё не.

Гуфта мешавад, ки намояндагони Ҳамос розӣ шудаанд, ки ҷасади чор гаравгонро бидуни ҳузури камераҳо супоранд ва дар посух ҳукумати Исроил эълон кард, ки раванди озод кардани маҳбусонро идома медиҳад.

Хадамоти зиндонҳои Исроил дақиқ нагуфт, ки маҳбусон якбора озод хоҳанд шуд ё дар чанд марҳила. Яке аз мақомоти маҳаллии Исроил гуфт, ки раванди озодсозии асирони фаластинӣ марҳила ба марҳила сурат мегирад.

Қаблан, сарвазири Исроил Бинямин Натанёҳу гуфта буд, ки озод намудани садҳо маҳбуси фаластиниро ба таъхир меандозад, то он замоне ки гаравгонҳои дигар озод шаванд ва ин бидуни “маросимҳои таҳқиромез” анҷом мегирад.

Ёдовар мешавем, ки рӯзи шанбе, 22-уми феврал Ҳамос дар доираи як табодули эҳтимолӣ шаш гаравгони исроилиро озод кард ва онҳоро ба намояндагони Салиби Сурх дар минтақаи Ғазза супорид.

Ин шаш нафар охирин асирони исроилие буданд, ки бар асоси марҳилаи аввали созишномаи оташбас озод мешуданд. Созишномаи оташбас миёни Исроил ва Ҳамос бо миёнравии Қатар, Миср ва ИМА оғоз шуд.

Дар ҷараёни барқарории оташбас ду тараф табодули асиронро оғоз намуданд, ки то имрӯз идома дорад. ИМА, Қатар ва Миср талош мекунанд, ки оташбаси доимӣ дар Ғазза барқарор шавад. Ҳамос таъкид кардааст, ки агар оташбаси доимӣ дар Ғазза барқарор шавад, ҳозир аст, ҳамаи асирони исроилиро озод кунад.

Dialog.tj