Фридрих Мертс, сарвазири эҳтимолии Олмон изҳори шубҳа кард, ки эътилофи низомӣ-амниятии аврупоии НАТО то моҳи июн дар шакли кунунии худ боқӣ монад. Ӯ ин изҳоротро дар посух ба суханони Доналд Трамп, президенти ИМА баён карда, афзуд, ки Аврупо бояд ҳарчӣ зуд қобилияти дифоии мустақилро рушд диҳад.

Ба гузориши “Рейтерс” Мертс пас аз пирӯзии ҳизби муҳофизакораш дар интихоботи федералии Олмон, дар як барномаи телевизионӣ гуфт: “Ман ҳеч гоҳ фикр намекардам, ки маҷбур мешавам чунин чизеро дар як барномаи телевизионӣ гӯям, аммо баъди суханони ҳафтаи гузаштаи Доналд Трамп маълум шуд, ки ин ҳукумат (ИМА) ба сарнавишти Аврупо аҳамияти зиёд намедиҳад”.

Ҳукумати Трамп ҳафтаи гузашта муттаҳидони аврупоиро ба тааҷҷуб во дошт ва аз онҳо талаб кард, ки масъулияти амнияти худро ба уҳда гиранд ва камтар аз Иёлоти Муттаҳида вобаста бошанд. Ҳамзамон, Вашингтон гуфтугӯҳоро бо Русия барои хотима додани ҷанги Украина оғоз кард, бидуни он ки Аврупоро дар ин раванд ҳамроҳ созад.

Пит Ҳегсет, вазири дифои ИМА, ҳушдор дод, ки "воқеиятҳои сахти стратегӣ" амрикоиҳоро водор месозад, таваҷҷуҳашонро ба амнияти Аврупо кам кунанд.

Бо ишора ба нишасти НАТО, ки барои моҳи июн ба нақша гирифта шудааст, Мертс гуфт: "Ман кунҷкоб ҳастам, ки оё то он замон НАТО ҳанӯз дар шакли кунуниаш боқӣ мемонад ё мо маҷбур мешавем, хеле зуд қобилияти дифоии мустақили Аврупоро рушд диҳем".

Дар посух ба суханони Мертс, Каспар Велдкамп, вазири корҳои хориҷии Нидерланд, гуфт: "Ин нишон медиҳад, ки мо дар оғози як давраи нав қарор дорем. Даврае, ки пас аз суқути Девори Берлин оғоз шуд ва ҳоло ба анҷом расидааст. Аврупоиҳо бояд интизориҳои воқеӣ аз муносибатҳои худ бо ИМА дошта бошанд."

Мертс рӯзи ҷумъа дар шабакаи телевизионии “ZDF” гуфт, Олмон бояд барои он омода бошад, ки Трамп шояд ба уҳдадориҳои дифои дастаҷамъии НАТО бе қайду шарт пойбанд намонад. Ӯ таъкид кард, ки ин масъала метавонад ба вобастагии Олмон ба "чатри атомии" ИМА низ таъсир расонад ва пешниҳод кард, ки музокироте бо Фаронса ва Британияи Кабир барои дастгирии атомии онҳо баргузор шавад.

Dialog.tj