Президенти Украина Владимир Зеленский рӯзи якшанбе, 23-уми феврал дар нишасти хабарӣ таъкид кард, ки агар дар Украина сулҳ ояд ва ин кишвар узви НАТО шавад, ҳозир аст аз мақоми президентӣ канорагирӣ кунад.

Владимир Зеленский дар ин нишасти хабарӣ афзуд, ки мехоҳад Доналд Трамп, президенти Иёлоти Муттаҳидаи Амрикоро дар “ҷойгоҳи як шарик барои Украина ва чизе фаротар аз як миёнарави сода миёни Маскав ва Киев бубинад”.

Доналд Трамп барои хатми ҷанг ва барқарории сулҳ дар Украина ба Владимир Зеленский фишорҳоро афзоиш додааст. Президенти Амрико бо ҳамлаҳои шадиди лафзӣ Владимир Зеленскийро сабабгори ҷанг дар Украина низ хитоб кардааст.

Музокироти сулҳ барои поёни ҷанги Украина ва Русия ҳафтаи қабл дар Арабистони Саудӣ оғоз шуд. Тибқи иттилои расонаҳо, қарор аст ҳафтаи оянда даври дуюми музокироти сулҳи Украина оғоз шавад.

Дар раванди оғози музокирот миёни Вашингтон ва Русия ҳукумати Амрико Владимир Зеленскийро даъват накард. Дар пайи иқдомҳои ҳукумати Амрико Владимир Зеленский гуфт, ки сулҳи бидуни ҳузури ҳукумати Украинаро нахоҳад пазируфт.

Доналд Трамп аз масрафи ҳангуфти буҷаи Амрико ба ҷанги Украина нигаронӣ карда, гуфт, ки Украина бояд кумакҳоро бозпас диҳад. Доналд Трамп мехоҳад дар ивази кумакҳо ба Украина 50 фоиз аз кони маъданҳои камёби ин кишварро соҳиб шавад.

Dialog.tj