Оғози нахустин даври гуфтугӯҳо барои сулҳи Украина ва бозбинии равобит миёни Русия ва Иёлоти Муттаҳидаи Амрико дар расонаҳои дунё фирку андеша ва таҳлилҳои мухталиферо ба вуҷуд овардааст.

Қисме бо чашми умед ба раванди оғози сулҳи Украина менигаранд. Гурӯҳи дигар аз он нигаронанд, ки канор гузоштани бозингарони асосии ин ҷанг боиси шикасти созишҳо ё тафовуқоти ҳосилшуда мегардад.

Дар робита ба ҳадсу гумонзаниҳо хабаргузории давлатии Русия – “РИА Новости” бо коршиноси соҳаи стратегӣ ва расонаҳо – Мирко Колунҷич суҳбат анҷом додааст.

Коршиноси олмонӣ Мирко Колунҷич дар ин суҳбат таъкид мекунад, президенти Иёлоти Муттаҳидаи Амрико дар мизи музокирот талош хоҳад кард, ки манфиатҳои максималиро барои кишвараш ба даст оварад.

Мирко Колунҷич таъкид кардааст, ки Трамп ва ҳайти ҳукуматаш вазъиятро хуб дарк намудаанд. Ба таъкиди ӯ, ин нукта чизест, ки ҳукуматҳои қаблӣ аз он маҳрум буданд.

“Фаҳмиши амиқи вазъият, донишу огоҳӣ, омода будан ба гӯш кардани ҷонибҳо. Трамп фаҳмид, ки Русия дар сиёсати ҷаҳонӣ нақши калидӣ дорад ва бидуни он ҳаллу фасли низоъҳои глобалӣ, ба вижа низоъи Украина ва ё амалӣ кардани лоиҳаҳои иқтисодӣ ғайримумкин аст” – таъкид мекунад коршиноси олмонӣ Мирко Колунҷич.

Ин коршинос меафзояд, ки агар ба Шарқи Наздик, Осиё, БРИКС, Чин, Тайван ва ё Африқо нигоҳ кунем, ба рӯшанӣ дида мешавад, ки Русия дар ҳама ҷо нақши калидӣ дорад.

“Аз ин рӯ, барои Иёлоти Муттаҳидаи Амрико мантиқӣ аст, ки муносибатҳояшро бо Маскав бар асоси гуфтугӯи бомувозинат созмон диҳад”- афзуд Мирко Колунҷич.

Мирко Колунҷич дар идома бо таъкид бар ин нукта, ки Трамп ба Русия бо назари прагматикӣ бархӯрд мекунад, афзуд “ин чизест, ки дар ҳукуматҳои қаблии Амрико мушоҳида намешуд”

“Трамп як музокиракунандаи ботаҷриба аст ва кӯшиш хоҳад кард, ки аз музокираҳои оянда барои Иёлоти Муттаҳидаи Амрико ҳадди аксари манфиатро ба даст орад” – таъкид мекунад коршиносӣ олмонӣ.

Дар идомаи суҳбат ӯ меафзояд, оғози раванди гуфтугӯҳо фурсати муносиб барои Русия аст, ки мавқеи ҷаҳонии худро устувор кунад.

“Ҳоло барои Русия муҳим аст, ки на танҳо ба ҳодисаҳо вокуниш нишон диҳад, балки бояд манфиатҳои худро дар арсаи ҷаҳонӣ фаъолона пеш барад. Русия бояд бештар бо қарори қавӣ ва шаффоф дар равандҳои ҷаҳонӣ шомил шавад”- мегӯяд Мирко Колунҷич.

Изҳори назари коршиноси олмонӣ дар бораи ояндаи музокироти Русия ва Амрико дар ҳоле садо медиҳад, ки пас аз оғози гуфтугӯҳои Риёз бархе кишварҳои аврупоӣ ва бахусус Украина нигаронии худро баён кардаанд. Онҳо гуфтаанд, ки Амрико талош дорад, Украина ва Иттиҳоди Аврупоро аз музокирот канор гузорад.

Пас аз баёни чунин нигарониҳо вазири корҳои хориҷии Амрико Марко Рубио иттилоъ дод, ки муттаҳидони Амрико аз раванди сулҳ канор гузошта нахоҳанд шуд.

Юрий Ушаков, мушовири бахши сиёсати хориҷии Владимир Путин дар суҳбат бо “Шабакаи якум” таъкид кард, ки Русия ва Амрико барои ташкил намудани як гурӯҳи корӣ ба созиш расиданд. Тибқи гуфтаи ӯ, гурӯҳи кории Маскав ва Вашингтон гуфтугӯҳои минбаъдаро пеш хоҳанд бурд. Мушовири бахши сиёсати хориҷии Русия дар суҳбат бо телевизиони “Шабакаи якум”-и Русия иттилоъ дод, ки Амрико Кит Келлогг - фиристодаи махсуси Трамп дар умури Украинаро роҳбари гурӯҳи музокиракунанда таъйин кардааст.

Dialog.tj