Владимир Зеленский, президенти Ҷумҳурии Украина аввалин бор расман эълон кард, ки аз замони оғози ҳамлаи Русия ба хоки Украина 43 ҳазор сарбози украинӣ кушта ва 370 ҳазори дигар захмӣ шудаанд.

Президенти Украина Владимир Зеленский рӯзи якшанбе, 16-уми феврал дар саҳифаи телеграми худ аввалин бор шумораи мушаххас ва теъдоди талафоти сарбозони Украинаро эълон намуд. Владимир Зеленский бо нашри омори расмии талафоти артиши Украина гуфт, ки иттилооти нашрнамудаи расонаҳо дар хусуси талафоти низомиёни украинӣ иғроқомез аст.

Дар ин паём Владимир Зеленский ба талафоти низомиёни рус низ ишора намуда, афзуд, талафоти низомиёни рус аз 750 ҳазор фаротар рафта, ки аз ин миқдор 198 ҳазор кушта ва беш аз 550 ҳазор нафар маҷруҳ гардидаанд. Ин иддаои президенти Украинаро мақомоти рус рад мекунанд.

Владимир Зеленский бори дигар ба зарурати дастёбӣ ба як сулҳи одилонаро таъкид кард ва ҳушдор дод, ки оташбас бидуни замонаҳои амниятӣ метавонад боиси азсаргирии ҷанг гардад.

“Як оташбаси бидуни замонатҳои мушаххас ба ин маъност, ки ҷанг метавонад дар ҳар лаҳза аз сар гирифта шавад. Ҳамон тавр, ки Путин қаблан ин корро кардааст” – таъкид намуд Владимир Зеленский.

Президенти Украина афзуд, ки барои пешгирӣ аз талафоти бештари низомиёни украинӣ бояд сулҳи пойдор таъмин шавад.

Истиқболи президенти Украина аз сулҳи пойдор дар ҳолест, ки тайи як ҳафтаи охир кӯшиши барқарор намудани оташбас ва сулҳ аз сӯйи Иёлоти Муттаҳидаи Амрико ва Федератсияи Русия оғоз шудааст.

Нахустин даври музокироти Русия ва Амрико дар шаҳри Риёзи Арабистони Саудӣ бидуни ҳузури мақомоти Украина ва Иттиҳоди Аврупо баргузор мегардад. Доналд Трамп гуфтааст, ки барои поён додан ба ҷанги Украина мустақиман бо Русия гуфтугӯ мекунад.

Тибқи иттилои расонаҳо дар ҳоли ҳозир ҳайатҳои музокиракунандаи Амрико ва Русия барои дидору гуфтушунид дар Арабистони Саудӣ қарор доранд.

Сергей Лавров, вазири корҳои хориҷии Федератсияи Русия гуфт, ки дар музокироти сулҳи Украина Иттиҳоди Аврупо ҳеч нақше нахоҳад дошт.

Иттиҳоди Аврупо нигарони он аст, ки Доналд Трамп бидуни ҳузури онҳо мувофиқатномаи сулҳ бо Украинаро имзо мекунад. Ин нигарониҳо боиси он шудааст, ки сарони кишварҳои Иттиҳоди Аврупо нишасти изтирорӣ баргузор кунанд.

Президенти Иёлоти Муттаҳидаи Амрико борҳо паёмҳои мусбат барои ҳалли эҳтимолии муноқишаи Украина ироа намудааст. Чанде пеш ӯ нимшӯхиву нимҷиддӣ гуфт, ки “Украиниҳо шояд рус шаванд ё нашаванд”.

Сиёсати пешгирифтаи Доналд Трамп оид ба масъалаи ҷанги Украина Владимир Зеленский ва ҳампаймононашро дар ҳолати ногувор қарор додааст. Ба назар мерасад, ки президенти Амрико мустақиман бо Русия қазияи ҷанги Украинаро ҳаллу фасл хоҳанд кард.

Dialog.tj