Мақомоти Ҷумҳурии Туркия ҳафтае қабл тасмим гирифтанд, ки механизми сафари “усули шартӣ”-ро бекор кунанд. Ин тасмим боиси он гаштааст, шаҳрвандони хориҷие, ки ба ин кишвар сафар мекунанд, ба мушкилот рӯ ба рӯ шаванд.

“Усули шартӣ” –и сафар имкон медод, ки шарҳвандони хориҷӣ дар сурати дуруст набудани ҳуҷҷатҳо, рад шудани раводиди иқомаи муваққатӣ вориди Туркия шуда, дубора барои дуруст намудани ҳуҷҷатҳояшон иқдом кунанд.

Пас аз бекор шудани механизми “усули шартӣ” бисёре аз шаҳрвандони Осиёи Марказӣ, аз ҷумла Ӯзбекистон ва ҳамчунин, Русия дар майдони ҳавоии Туркия ба мушкил рӯ ба рӯ шудаанд.

Дар пайи сахтгириҳои мақомоти Туркия Консули генералии Ӯзбекистон дар Ҷумҳурии Туркия ба шаҳрвандонаш ҳушдор дод, ки бидуни ҳуҷҷатҳои тасдиқшуда ё гирифтани раводиди сафар ба Туркия сафар накунанд. Ин консулгарӣ муроҷиат кардааст, ки дар ҳолати пеш омадани мушкилот ба консулгарӣ муроҷиат намоянд.

Бар асоси қоидаҳои нави Туркия шаҳрвандони хориҷие, ки муҳлати будубошашон гузашта ё раводидашон рад шудааст, наметавонанд вориди ин кишвар шаванд. Дар сурати дуруст набудани ҳуҷҷатҳо аз 3 то 6 моҳ аз вуруд ба Туркия манъ карда мешаванд. Дар ин хусус, раиси Ассотсиатсияи ҳимояи ҳуқуқи шаҳрвандони хориҷӣ хабар додааст.

Расонаҳо иттилоъ медиҳанд, ки дар рӯзи 10-уми феврал 150 шаҳрванди хориҷӣ дар майдони ҳавоии Туркия дар мондаанд ва ба онҳо иҷозаи вуруд дода намешавад. Гуфта мешавад, ки онҳо аз тағйироти нави мақомоти Туркия бехабар будаанд.

Бар асоси иттилоъ, қарор дар хусуси бекор намудани механизми “усули шартӣ” як ҳафта қабл қабул шуда буд ва дар хусуси ин тағйирот огоҳӣ дода нашудааст.

Ҷорӣ намудани қоидаҳои сахттари сафар ба Туркия дар ҳолест, ки чанд моҳ қабл Туркия низоми бидуни раводид бо Тоҷикистонро пурра бекор кард.

Ҷумҳурии Туркия барои пешгирӣ аз муҳоҷирати ғайриқонунӣ ба кишварҳои Иттиҳоди Аврупо иқдомҳои сахтгиронаро амалӣ мекунад. Кишварҳои Иттиҳоди Аврупо Туркияро муттаҳам мекунанд, ки муҳоҷирони ғайриқонуниро ба ин кишварҳо равон мекунад.

Dialog.tj