Аз 14-ум то 16-уми феврал дар шаҳри Бокуи Озарбойҷон мусобиқаи “Baku Grand Slam 2025” (“Тоскулоҳи бузург”) бо иштироки 258 варзишгар (166 мард ва 92 зан) аз 36 кишвар баргузор шуд.

Дар мусобиқаи мазкур Ҷумҳурии Тоҷикистонро шаш варзишгар Муҳиддин Асадуллоев, Абубакр Шеров (ҳарду дар вазни -73 кг), Беҳрӯзи Хоҷазода, Сомон Маҳмадбеков (ҳарду дар вазни -81 кг), Кароматулло Ҳакимов, Ҷаҳонгир Маҷидов (ҳарду дар вазни -100 кг) намояндагӣ карданд.

Варзишгарони тоҷик дар ин мусобиқа ду медали биринҷӣ ба даст оварданд. Медали якумро Абубакр Шеров ба даст овард. Ӯ дар вазни то 73 кило баромад карда, варзишгарон аз Хорватия, Кореяи Ҷанубӣ, Ҷопонро шикаст дода, дар даври ниманиҳоӣ аз Рашид Маммадалиеви озарӣ ноком шуд. Сипас, барои нишони биринҷӣ бар Георгий Чихелидзеи гурҷӣ ғолиб омад.  

Ҷаҳонгир Маҷидов, паҳлавони 24-солаи тоҷик, ки дар вазни то 100 кило баромад кард, медали дуюми биринҷиро аз “Baku Grand Slam 2025” ба Тоҷикистон овард. Ӯ дар даври якум Кристиан Тот аз Маҷористон, дар даври дуюм Рустам Шораҳматов аз Узбекистонро шикаст дода, дар нимфинал аз Арай Дотаи ҷопонӣ шикаст хӯрд. Ҳамин тавр, барои медали биринҷӣ бо гуштигири дастаи бетараф (IJF) Муҳаммадалӣ Матаев рақобат карда, ғолибият ба даст овард.

Dialog.tj