Абдулфаттоҳ Сисӣ, президенти Миср рӯзи 11-уми феврал таъкид кард, ки бозсозии минтақаи Ғазза бидуни овора намудани мардуми Фаластин бояд сурат гирад.

Абдулфаттоҳ Сисӣ дар гуфтугӯ бо сарвазири Дания таъкид кард, ки  зарурати бозсозии минтақаи Ғазза бидуни кӯчи иҷборӣ ва овора намудани фаластиниҳо ба миён омадааст. Ӯ гуфт, ки бозсозии минтақа бояд ҳуқуқи мардуми Фаластин барои зиндагӣ дар ин минтақаро тазмин намояд.

Рӯзи гузашта низ Ҷумҳурии Миср бо нашри баёния таъкид кард, ки мухолифи кӯчи иҷбории мардуми Фаластин дар қиболи бозсозии минтақаи Ғазза аст. Президенти Миср ҳушдор дод, ки овора намудани мардуми Фаластин боиси афзоиши хушунатҳо хоҳад шуд ва аз ин рӯ, кишвараш аз лоиҳаи кӯчи иҷбории фаластиниҳо пуштибонӣ намекунад.

Чанде қабл, Доналд Трамп, президенти Иёлоти Муттаҳидаи Амрико аз лоиҳаи бозсозии минтақаи Ғазза ба баҳои кӯчондани сокинони он рӯнамоӣ кард. Трамп гуфт, ки бояд Урдун ва Миср оворагони фаластиниро бипазиранд ва барояшон замини сукунат бидиҳанд.

Доналд Трамп бо вуҷуди мухолифати кишварҳои араб ва созмонҳои ҷаҳонӣ ба амалӣ намудани лоиҳаи кӯчи иҷбории фаластиниҳо пофишорӣ дорад.

11-уми феврал Малик Абдуллоҳ, подшоҳи Урдун дар дидор бо Доналд Трамп масъалаи кӯчондани фаластиниҳо ва бозсозии минтақаи Ғаззаро баррасӣ кард. Дар нишасти матбуотӣ подшоҳи Урдун таъкид кард, ки кишвараш баъди пешниҳоди Миср оид ба ҳалли масъалаи Ғазза тасмим хоҳад гирифт.

Малик Абдуллоҳ дар Кохи Сафед гуфт, ки Урдун омодааст 2000 кӯдаки маҷруҳи фаластиниро барои табобат ва нигоҳубин дар Урдун бипазирад.

Дар пайи вокуниши манфии Урдун ва Миср дар робита ба кӯчонидани фаластиниҳо Доналд Трамп таҳдид кард, ки агар Миср ва Урдун ба пазириши оворагони фаластинӣ розӣ нашаванд, кумакҳои Иёлоти Муттаҳидаи Амрико ба ин кишварҳо қатъ хоҳад шуд.

Бар асоси иттилои расонаҳо, Абдулфаттоҳ Сисӣ бояд ба Иёлоти Муттаҳидаи Амрико барои дидору гуфтугӯ бо Доналд Трамп сафар мекард. Аммо чанде қабл расонаҳои мисрӣ гузориш доданд, ки Абдулфаттоҳ Сисӣ сафараш ба Амрикоро лағв кардааст.

Dialog.tj