Вазорати корҳои хориҷии Арабистони Саудӣ суханони Бенямин Натанёҳу дар робита ба кӯчонидани фаластиниҳо ба Арабистони Саудиро шадидан маҳкум кард.

Ин Вазорати Арабистони Саудӣ дар баёнияи худ гуфтааст, ки Исроил намедонад сарзамини “бародарони фаластинӣ” барои Арабистони Саудӣ чӣ маъное дорад.

Вазорати корҳои хориҷии Арабистон таъкид карда, ки изҳороти Бенямин Натанёҳу дар робита ба кӯчонидани мардуми Фаластинро “қотеъона” рад мекунад.

Ин Вазорат гуфтааст, мардуми Фаластин ба сарзамини худ ҳақ доранд ва онҳо муҳоҷир нестанд, ки режими Исроил ҳар замоне, ки бихоҳад, онҳоро ихроҷ кунад.

Арабистони Саудӣ таъкид кардааст, ки тӯли 75 сол инҷониб Исроил нисбат ба мардуми Фаластин “беадолатӣ” мекунад.

Изҳороти Вазорати корҳои хориҷии Арабистони Саудӣ дар ҳолест, ки рӯзи панҷшанбеи ҳафтаи гузашта сарвазири Исроил Бенямин Натанёҳу гуфт, ки Арабистони Саудӣ барои эҷоди як кишвари мустақил барои фаластиниҳо замини кофӣ дорад.

“Саудиҳо метавонанд як давлати фаластиниро дар Арабистон эҷод кунанд, зеро онҳо заминҳои зиёде доранд” – гуфт Бенямин Натанёҳу.

Баҳси Арабистони Саудӣ бо Бенямин Натанёҳу дар ҳолест, чанде қабл Доналд Трамп пешниҳод карда буд, ки мардуми Фаластин ба дигар минтақаҳо кӯчонида шаванд. Вай исрор карда буд, ки барои мардуми Фаластин дар дигар минтақаи зебо ва амн баҳри зиндагӣ хонаҳои беҳтаре хоҳанд сохт.

Бисёре аз кишварҳо, аз ҷумла Созмони Милали Муттаҳид мухолифати худро ба кӯчонидани мардуми Фаластин изҳор доштанд.

Dialog.tj