Вазирони корҳои хориҷии кишварҳои араб бо доир кардани нишасте дар шаҳри Қоҳираи Миср таъкид карданд, ки мухолифи кӯчонидани фаластиниҳо аз сарзаминҳояшон “таҳти ҳар шароит ё бо исботи ҳар далел” мебошанд.

Вазирони корҳои хориҷии кишварҳои араб ба пешниҳоди Доналд Трамп, президенти ИМА барои кӯчонидани мардуми Ғазза ба Миср ва Урдун вокуниш карда, онро ғайриқобили қабул хонданд.

Вазирони корҳои хориҷа ва мақомоти Иттиҳодияи араб, Урдун, Арабистони Саудӣ, Қатар ва Миср ҳафтаи гузашта дар баёнияи муштарак таъкид намуданд, ки “муштоқи ҳамкорӣ бо ҳукумати Трамп барои дастёбӣ ба сулҳи одилонаву фарогир дар Ховари Миёна вобаста ба роҳи ҳалли эҷоди ду кишвар” ҳастанд.

Қобили зикр аст, ҳафтаи гузашта Доналд Трамп гуфт, ки Урдун ва Миср “Бояд ба шакли муваққатӣ ё дарозмуддат” теъдоди бештари фаластиниёни минтақаи Ғаззаро бипазиранд. Президенти ИМА минтақаи Ғаззаро “як вайрона”-и комил номид, ки дар он  беш аз 2,3 миллион аҳолӣ зиндагӣ мекунад.

Вазирони корҳои хориҷии кишварҳои араб бо вокуниши шадид дар баёния эълон намуданд, ки чунин иқдом “боиси густариши даргириҳо шуда, суботи  минтақаро таҳдид ва чашмандози сулҳро заиф” хоҳад кард.

“Мо бо радди ҳар гуна талош барои хатча ворид кардан ба ҳуқуқи ғайри қобили инкори фаластиниҳо ба ҳар шакл ва  таҳти ҳар шароит ё таваҷҷуҳе таъкид мекунем: чӣ аз тариқи шаҳраксозӣ бошад ё дигар” – таъкид шудааст дар баёнияи Вазирони корҳои хориҷии кишварҳои араб.

Вазирони хориҷаи кишварҳои араб аз барномаи Ҷумҳурии Миср барои баргузории конфронс оид ба бозсозии минтақаи Ғазза истиқбол намуданд. Ин конфронс, ки ҳанӯз рӯзи баргузориаш мушаххас нашудааст, мақсад дорад, таваҷҷуҳи кишварҳои ҷаҳонро ба бозсозии минтақаи Ғазза ҷалб кунад.

Президенти Миср Абдуфаттоҳ Сисӣ ҳафтаи қабл идеяи кӯчонидани фаластиниён аз минтақаи Ғаззаро рад намуда, таъкид кард, ки кишвараш ҳеч вақт ба ин зулми таърихӣ ҳамроҳ нахоҳад шуд.

Яман Ал-Сафдӣ, вазири хориҷаи Урдун низ дар баёнияе гуфт: “Мухолифати мо ба кӯчонидани фаластиниҳо собит ва ғайриқобили тағйир аст. Урдун барои урдуниҳо ва Фаластин барои фаластиниҳост”.

Бо вуҷуди мухолифати кишварҳои араб ба кӯчонидани иҷбории фаластиниҳо чанд рӯз қабл Доналд Трамп бори дувум гуфт, ки “Мо корҳои зиёде барои онҳо анҷом медиҳем ва онҳо ин корро хоҳанд кард”.

Ишораи ӯ, эҳтимолан ба кумакҳои низомӣ ва сиёсии Иёлоти Муттаҳидаи Амрико ба кишварҳои араб аст.

Dialog.tj