Дар пайи сафари сарвазири Исроил Бенямин Натанёҳу ба Иёлоти Муттаҳидаи Амрика, ВАО –и русӣ эълон карданд, ки як ҳайати баландпояи Ҳамос барои гуфтугӯ бо мақомоти Вазорати корҳои хориҷии Русия ба Маскав сафар мекунанд.

“РИА Новости” хабар дод, ки Мӯсо Абдумарзуқ, муовини сиёсии гурӯҳи Ҳамос ва ҳайати ӯ рӯзи душанбе вориди Маскав шуда, бо мақомоти олии Вазорати корҳои хориҷии Федератсияи Русия мулоқот хоҳанд кард. Ҷузъиёти мулоқоти ҳайати Ҳамос бо мақомоти русӣ ифшо нашудааст.

Сафари ҳайати Ҳамос ба Маскав дар ҳоле сурат мегирад, ки Бенёмин Натанёҳу барои музокироти фарогир бо Доналд Трамп роҳии Вашингтон шуд. Дар назар аст, ки Бенямин Натанёҳу дар ин сафар бо Доналд Трамп мулоқот намуда, назари ӯро барои ҳимоят аз Исроил дар баробари Ҳамос ва муттаҳидонаш ҷалб кунад.

Бенямин Натанёҳу қабл аз сафар ба Иёлоти Муттаҳидаи Амрико гуфт, “Тасмимҳое, ки дар ҷанг гирифтаем, чеҳраи Ховари Миёнаро тағйир медиҳад. Ман бовар дорам, ки бо ҳамкории наздик бо Доналд Трамп, президенти ИМА метавонем нақшаро ҳатто беҳтару беҳтар тағйир диҳем”.

Сафари сарвазири Исроил ба Вашингтон ва сафари ҳайати Ҳамос ба Русия дар ҳоле сурат мегирад, ки беш аз як ҳафта боз дар минтақаи Ғазза оташбас барқарор аст. Дар тайи беш аз як ҳафта дар чанд марҳила табодули асирон миёни Исроил ва Ҳамос сурат гирифт. Бисёре аз кишварҳои арабӣ, ки ташаббускори ба миён омадани оташбас дар Ғазза ҳастанд, кӯшиш мекунанд, оташбас ба сулҳи пойдор табдил ёбад.

Доналд Трамп дар корзори интихоботиаш гуфта буд, ки ба ин ҷанги беъмано хотима медиҳад. Дар пайи фишорҳои ҳукумати Доналд Трамп тафовуқи оташбас миёни Ҳизбуллоҳ - Исроил ва Ҳамос – Исроил барқарор шуд.

Дар ҷанги беш аз яксолаи Ҳамосу Исроил садҳо нафар куштаву захмӣ шуданд ва минтақаи Ғазза комилан ба харобазор табдил шуд. Ҳоло Исроил иҷозат додааст, ки сокинони Ғазза ба хонаҳои худ баргарданд.

Ҷанги Исроил бо Ҳамосро бисёре аз созмонҳои ҳуқуқи башар ваҳшиёна хонда, гуфтаанд, ки Исроил дар ҷараёни ҷанг ба ҷиноятҳои  зиддибашар даст задааст. Додгоҳи байналмилалии ГААГА қарори боздошти Бенямин Натанёҳу ва вазири собиқи дифои ин кишварро барои анҷом додани ҷиноятҳои зиддибашарӣ содир кардааст.

Dialog.tj