Як мақоми Сипоҳи посдорони Ҷумҳурии Исломии Эрон тасдиқ кард, ки кишвараш аз Федератсияи Русия ҷангандаи Суху-35 харидааст.

Ин мақоми Сипоҳи посдорони Эрон аз ҳамкориҳои фазояндаи ин кишвар бо Федератсияи Русия хабар дода, аввалин бор хариди ҷангандаи Суху-35  аз Федератсияи Русияро тасдиқ кард.

Алӣ Шодмонӣ, муовини ҳамоҳангкунандаи қароргоҳи маркази Хотам-ул-анбиё дар суҳбат бо хабаргузории “Исно”-и Эрон дар хусуси хариди ҷангандаҳо аз Русия шарҳ додааст. Аммо ӯ ишора ба теъдоди хариди ҷангандаҳо чизе нагуфтааст.

“Ҳар замоне, ки лозим бошад, барои тақвияти неруи ҳавоӣ, заминӣ ва дарёии худ хариди низомӣ анҷом медиҳем ва тавлиди таҷҳизоти низомӣ низ суръат гирифтааст” – гуфт Алӣ Шодмонӣ.

Ин фармондеҳи Сипоҳи посдорони Ҷумҳурии Исломии Эрон бо ишора ба рақиби низомии Эрон дар минтақа - Исроил чунин гуфта: “Агар душман ҳамоқат кунад, таъми талхи исобати мушакҳои моро хоҳад чашид ва ҳеч як аз манфиатҳояш дар сарзамини ишғолӣ маҳфуз намемонад”.

Чанде қабл, моҳи январи ҳамин сол президенти Ҷумҳурии Исломии Эрон Масъуд Пизишкиён ва президенти Федератсияи Русия Владимир Путин мувофиқатномаи ҳамкории стратегии ҷомеъро имзо карданд, ки дар он дар хусуси фурӯши аслиҳа ишора нашудааст. Аммо дар он мувофиқатнома тазаккур ёфтааст, ки ду кишвар “ҳамкории низомӣ-фаннӣ” –и худро рушд хоҳанд дод.

Рейтерз хабар медиҳад, ки неруҳои ҳавоии Ҷумҳурии Исломии Эрон танҳо чанд фарванд ҳавопаймои ҷангӣ, аз ҷумла ҷангандаҳои русӣ ва ҳамчунин, ҷангандаҳои амрикоии моделҳои қадимиро дар ихтиёр доранд, ки қабл аз Инқилоби Исломӣ (соли 1979) харида шуда буданд.

Dialog.tj