Фараҳманд Каримов, сарояндаи ҷавон таронаи навбатиашро бо номи “Паймон” нашр кард, ки аз дӯстиву пайвандии Ҷумҳурии Тоҷикистон ва Ҷумҳурии Исломии Эрон қисса мекунад.

Суруди “Паймон” пас аз сафари Президенти Ҷумҳурии Исломии Эрон Масъуд Пизишкиён ба Тоҷикистон нашр шуд ва намоҳангаш аз лаҳзаҳои гуногуни ин сафар сохта шудааст.

Матни таронаи мазкур ба қалами Шоираи Раҳимҷон тааллуқ дорад, аммо нақароти он байти машҳури Абуабдуллоҳи Рӯдакӣ мебошад:

Ҳеч шодӣ нест андар ин ҷаҳон,

Бартар аз дидори рӯи дӯстон.

Бояд гуфт, ки ҳамин ду мисраъро Пешвои миллат муҳтарам Эмомалӣ Раҳмон дар вохӯрӣ бо Президенти Ҷумҳурии Исломии Эрон Масъуд Пизишкиён қироат карда буданд.

То имрӯз таронаи “Паймон”-ро танҳо дар саҳифаи шахсии сароянда зиёда аз 60 ҳазор кас бозбинӣ кардаанд. Дар ҳоле ки овозхонҳои мо ба ин гуна мавзуъҳо таваҷҷуҳи кам доранд, ин миқдор тамошобин пайдо кардани таронаи мазкур нишондиҳандаи баланд аст.

Dialog.tj