Гурӯҳҳои мусаллаҳи мухолифи режими Башор Асад тайи ду рӯзи ахир шаҳрҳои Ҳумс, Ҳамо ва Даръоро, ки ба пойтахти Сурия шаҳри Димишқ бисёр наздик аст, тасарруф намуданд.

Шаби рӯзи 6-уми декабр воситаҳои ахбори омма хабар доданд, ки неруҳои мусаллаҳи мухолифи Башор Асад ба 5 километрии пойтахти Сурия наздик шуданд. Роҳбари гурӯҳи мусаллаҳ, ки зери номи “Таҳрир-аш-шом” дар пайи фурӯ пошонидани низоми ҳукумати Башор Асад ҳаст, дар суҳбат бо расонаи амрикоӣ гуфтааст, дар пайи эҷоди ҳукумати фарогир дар Сурия мебошад. Абдуллоҳ Ҷулонӣ, ки қаблан аз ӯ ба унвони террорист ном бурда мешуд, дар тозатарин изҳороти худ гуфтааст, ҳадафаш танҳо ташкили ҳукумат дар Сурия мебошад.

Тибқи гузориши ВАО Федератсияи Русия ҳамаи неруҳои низомиашро аз хоки Сурия хориҷ кардааст. Сафорати Русия дар Сурия аз шаҳрвандонаш хост, ки бо сабаби ноором шудани вазъият ин кишварро тарк кунанд. Бандари Тартус, ки дар он неруҳои баҳрии Русия мавқеъ доштанд, холӣ гардидааст. Русия киштиҳои ҷангиашро аз ин бандар берун бурдааст.

Ҳамчунин, дар иртибот бар Сурия хабарҳо мерасад, ки неруҳои низомии Эрон низ аз Сурия ақибнишинӣ карда, вориди хоки Ироқ шудаанд. Сайид Аббос Ироқчӣ, вазири корҳои хориҷии Эрон таъкид кард, ки ҳар чӣ Худо бихоҳад, сарнавишти Башор Асад ҳамон хоҳад шуд.

ВАО хабар дод, ки хонаводаи Башор Асад аз Сурия хориҷ шудааст. Тибқи гузоришҳо Башор Асад вориди Теҳрон гардидааст.

Раҷаб Тайиб Эрдуғон, президенти Туркия, ки ҳомии аслии гурӯҳҳои мусаллаҳи мухолифи Башор Асад аст, зимни эроди як паёми гуфт, ҳадафи аслии гурӯҳҳои мухолифи Башор Асад тасарруфи пойтахт аст.

Мақомоти исроилӣ аз фурӯ пошидани низоми Башор Асад шигифтзада шудаанд. Рӯзи 6-уми декабр нишасти амниятии ҳукумати Исроил баргузор шуд, ки дар асоси он ин кишвар худро барои фурӯпошии низоми Башор Асад омода мекунад.

Dialog.tj