Миёни Ҳизбуллоҳи Лубнон ва Исроил бо миёнҷигарии дипломатҳои амрикоӣ ва фаронсавӣ рӯзи чоршанбеи ҳафтаи ҷорӣ оташбас барқарор гардид.

Бар асоси созишномаи оташбас Ҳизбуллоҳ қатъномаи 1701-и СММ –ро мепазирад ва тибқи он аз 30 километрии марзи Исроил ақибнишинӣ мекунад ва ба ҳамин тариқ артиши Лубнон назорати комили марз бо Исроилро ба даст хоҳад гирифт. Бар асоси созишнома артиши Исроил тадриҷан аз ҷануби Лубнон хориҷ хоҳад шуд.

Аз субҳи рӯзи чоршанбе аллакай оташбас дар Лубнон ҷорӣ шуд. Тарафҳои ҷанг оташбасро риоя мекунанд. Тибқи иттилои ВАО ҳазорон сокинони лубнонӣ, ки аз ҷануби Лубнон фирор намуда буданд, дар ҳоли бозгашт ба хонаҳои худ ҳастанд.

Сарвазири Лубнон Наҷиб Миқотӣ дар иртибот бо бақарор шудани оташбас гуфт, ки “аз ҷомеаи байналмилалӣ хоста мешавад, барои поён додан ба ин таҷовуз ва иҷрои фаврии оташбас зудтар амал кунанд”.

Сарвазири Исроил Бенёмин Натанёҳу низ аз оташбас истибқол намуда, таъкид кардааст, ки агар Ҳизбуллоҳ бори дигар дар ҷануби Лубнон пойгоҳҳои низомӣ бисозад, дубора артиши Исрил ҳамла хоҳад кард.

Амрико ва Фаронса аз барқарор шудани оташбас миёни Исроил ва Ҳизбуллоҳ иҳзори хушнудӣ намуда, онро ягона роҳи поёни ҷанг маънидод намудаанд.

Эрон низ аз барқарор шудани оташбас миёни Ҳизбуллоҳ ва Исроил изҳори хушнудӣ намуда ва таъкид кард, ин оташбас боиси он мешавад, ки Эрон дар посухи ҳамлаҳои ҳавоии Исроил ба Эрон ва амалӣ намудани ҳамлаи “Содиқ 2” таҷдиди назар кунад.

Қобили зикр аст, ки ҷанги Ҳизбуллоҳи Лубнон бо Исроил аз замони оғози ҳамлаи Ҳамос, ки рӯзи 7-уми октябри соли 2023 сурат гирифт, шуруъ гардид. Пас аз таркиши пейҷерҳо, ки баъдан Исроил онро ба уҳда гирифт, ҷанг шиддати бештар гирифт. Дар ин ҷанг аксари роҳбарони Ҳизбуллоҳ кушта шуданд. Ҷануби Лубнон комилан вайрон шуда, ҷануби пойтахти ин кишвар Бейрут низ шоҳиди бомбаборони шадиди неруҳои ҳавоии Исроил буд. Ҳазорон нафар ғайринизомӣ дар ин ҷанг кушта шуданд. Ҳизбуллоҳ низ дар посух ба ҳамлаҳои Исроил ҷануби ин кишварро ҳамеша мавриди мушакборон қарор дод.

Dialog.tj