Мақомоти Ҷумҳурии Исломии Эрон ба Шурои мудирони Оҷонси байналмилалии неруи атомӣ (МАГАТЭ) гуфтаанд, ки агар дар ҳафтаи ҷорӣ зидди ин кишвар қатънома содир нашавад, омодаанд аз афзоиши захираҳои ғанишудаи 60% уран даст кашанд.

Хабаргузории “Рейтерз” бо такя ба чанд манбаъ навишт, ки аллакай мақомоти Эрон омодагӣ нишон дода, афзоиши ғанисозии 60% уранро қатъ кардаанд.

МАГАТЭ чанде қабл эълон кард, ки захираҳои урани ғанишуда беш аз 32 % аз миқдори муайяншуда дар тафоҳумномаи анҷомшуда дар музокироти 5 бар иловаи 1, ки дар соли 2015 имзо шуд, бештар аст.

Тибқи иттилои ВАО захираҳои гексафториди уран, ки то 60 % ғанисозӣ шудаанд, аз моҳи август аз ҳаҷми 164,7 кг то 182, 3 кг афзудаанд. МАГАТЭ маълумот медиҳад, ки 42 кг урани ғанисозишудаи 60 дарсадӣ аз нигоҳи назариявӣ “барои сохтани бомбаи атомӣ дар сурати ғанисозии минбаъда кофӣ мебошад”.

Рафаэл Гросси, раиси МАГАТЭ чанд рӯз қабл вориди Эрон шуда, аз муассисаҳои атомии ин кишвар дидан намуд. Вай бо мақомоти олирутбаи Эрон мулоқот намуда, оид ба оғози гуфтугӯ дар мавриди барномаи атомии Эрон музокирот анҷом дод.

Президенти Ҷумҳурии Исломии Эрон зимни мулоқот бо Рафаэл Гросси, раиси МАГАТЭ чунин таъкид намуд: “Бар асоси фатвои Роҳбари олӣ, мо на талош кардем ва на хоҳем кард, ки ба ягон тарз силоҳи атомӣ созем. Ҳеч кас ҳақ надорад аз ин сиёсат дур шавад”.

Dialog.tj