Доналд Трамп, раиси ҷумҳури Иёлоти Муттаҳидаи Амрико, гуфтааст, ки эҳтимол дорад ҳафтаи оянда дар ҳошияи нишасти “Ҳамкории иқтисодии Осиё ва Уқёнуси Ором” бо Владимир Путин, раиси ҷумҳури Русия ва Си Ҷинпин, роҳбари Чин, барои поён додан ба ҷанги Эрон мулоқот кунад.

Шабакаи “Ал-Ҷазира” субҳи рӯзи душанбе, 9-юми ноябр, гузориш додааст, ки Трамп ин мавзуъро дар иёлати Флорида дар суҳбат бо хабарнигорон матраҳ кардааст.

Бар асоси ин гузориш, Трамп гуфтааст: “Фикр мекунам, яке аз мулоқотҳо бо раиси ҷумҳур Путин ва раиси ҷумҳур Си барпо хоҳад шуд, ки ҷолиб хоҳад буд. Мо дар бораи масъалаҳои зиёде, аз ҷумла халъи силоҳи ҳастаӣ, гуфтугӯ хоҳем кард. Дар воқеъ, дар бораи мавзуъҳои зиёде суҳбат хоҳем кард. Мо талош дорем ба ҷанг дар Эрон поён диҳем ва дар ин роҳ пешрафти хубе дорем...”

Трамп ҳамчунин, иддао кардааст, ки амалиёти “Дарвозаи оҳанин”-и Иёлоти Муттаҳида, ки ҳадафаш халалдор кардани роҳҳои таъминоти заминии Эрон аст, ҳоло дар ҳоли иҷро қарор дорад.

Вай афзудааст: “Ин маънои онро дорад, ки ҳеч чиз тавассути замин вориди он намешавад. Ҳамон тавре ки медонед, дар пайи муҳосираи баҳрӣ, ҳеч чиз аз тариқи об низ ворид намешавад”.

Қобили зикр аст, ки созмони Ҳамкории иқтисодии Осиё ва Уқёнуси Ором, ки соли 1989 таъсис ёфтааст, 21 узв дорад. Аз ҷумла, Австралия, Канада, Ҷопон, Чин, Русия ва Иёлоти Муттаҳидаи Амрико аз аъзои ин созмон мебошанд. Роҳбарони кишварҳои узв ҳар сол бо якдигар мулоқот мекунанд.

Dialog.tj