Денис Шмигал, муовини аввали нахуствазир ва вазири энергетикаи Украина, гуфтааст, ки беш аз 80 дарсади нерӯгоҳҳои барқи ин кишвар дар пайи ҷанг осеб дида ё ба таври комил нобуд шудаанд.

Ба гузориши “Политика” (Politico), Шмигал гуфтааст, ки дар натиҷаи хисороти густарда ба зерсохтҳои энержии Украина, зарфияти тавлиди барқи ин кишвар дар зимистони гузашта ба 12 гигаватт коҳиш ёфт. Ба гуфтаи ӯ, ин вазъ боиси камбуди 6 гигаватт барқ дар саросари кишвар шуд.

Вай афзудааст, ки пеш аз оғози ҷанг бо Русия дар соли 2022, зарфияти умумии тавлиди барқи Украина ҳудуди 56 гигаватт буда.

Бар асоси ин гузориш, Украина аз поёни соли 2025 ҳамзамон бо сардии шадид ва идомаи ҳамлаҳо ба зерсохтҳои энержӣ бо буҳрони таъмини барқ рӯбарӯ шуд. Дар пайи ин вазъ, мақомоти Украина дар бахши энергетикии кишвар ҳолати изтирорӣ эълом карданд.

Гарчанде вазъи шабакаи барқи Украина дар моҳҳои охир то ҳадде беҳбуд ёфтааст, аммо коршиносон мегӯянд, ки ин шабака ҳанӯз ба таври комил барқарор нашудааст.

Шмигал пештар гуфта буд, ки Украина барои ҷуброни хисороти ҷанг бояд ҳудуди 10 гигаватт аз зарфияти тавлиди барқро эҳё кунад ва ҳамзамон 3 гигаватти дигар ба шакли тавлиди пароканда ба шабакаи барқ илова намояд.

Dialog.tj