Кумитаи ҳолатҳои фавқулода ва мудофиаи граждании назди Ҳукумати Ҷумҳурии Тоҷикистон иттилоъ дод, ки корҳои бартарафсозии оқибатҳои сел ки 11-ум ва 12-уми июл дар деҳаҳои Дарғ ва Каздони Ҷамоати деҳоти Шамтуч рух дода буд, идома доранд.

Манбаъ навиштааст, ки тибқи ҳисоби пешакӣ дар маҷмуъ 65 хонаи истиқоматӣ зарар дидааст. Аз ҷумла, дар деҳаи Дарғ 46 ва дар деҳаи Каздон 19 хона аз обу лойқа осеб дида, 3 хона дар деҳаи Дарғ қисман ва 1 хона дар деҳаи Каздон пурра хароб гардидааст.

Афзуда мешавад, ки аз 117 иншооти ёрирасон, 25 адад пурра хароб шуда, 92 адади дигар зери лойқа мондааст. Дар натиҷаи офати табиӣ 98 қитъаи замини наздиҳавлигӣ, 29,07 гектар замини кишоварзӣ, як қисми боғоту кишти картошка, ғалладона, сабзавот ва хӯроки чорво зарар дида, 14 сар чорвои майда талаф ёфтааст.

Гуфта мешавад, ки ба инфрасохтори маҳал низ хисороти ҷиддӣ расидааст. Аз ҷумла, 31,11 километр ҷӯйбору канал, як пули одамгузар, 5 километр хатти интиқоли неруи барқ, 23 сутуни барқ, як трансформатор, як зеристгоҳи барқӣ ва 5,2 километр хатти оби нӯшокӣ осеб дидаанд. Ҳамчунин, аз 11 воситаи нақлиёти зарардида 7 адад пурра корношоям гардида, 4 воситаи дигар ба таъмири асосӣ ниёз доранд.

Иттилоъ дода мешавад, ки ҳаҷми зарари расонида зиёда аз 7 миллион сомонӣ арзёбӣ мегардад. Ҳаҷми ниҳоии зарар пас аз анҷоми пурраи барӯйхатгирӣ, ҳисобу китоби хисорот ва таҳияи хулосаҳои соҳавӣ муайян карда мешавад.

Dialog.tj