Мақомоти ноҳияи мухтори Шинҷон-Уйғури Ҷумҳурии Мардумии Чин барои шаҳрвандони Ҷумҳурии Тоҷикистон 50 адад бурсия ҷудо намудааст.

Тавре ки Муассисаи давлатии «Маркази барномаҳои байналмилалӣ» хабар медиҳад, бурсияҳои мазкур барои таҳсил дар муассисаҳои таҳсилоти олии ноҳияи мухтори Шинҷон-Уйғури Ҷумҳурии Мардумии Чин дар соли таҳсили 2026-2027 пешбинӣ гардида, ба довталабон имконият медиҳанд, ки дар риштаҳои гуногуни муосир ва ҷавобгӯ ба талаботи бозори меҳнат таҳсил намоянд.

Қабули довталабон барои зинаҳои бакалавриат, магистратура ва аспирантура амалӣ шуда, зиёда аз 200 ихтисос ва барномаҳои таълимӣ пешниҳод мегардад.

Бурсия хароҷоти асосии таҳсилро фаро гирифта, барои донишҷӯён шароити мусоиди таълим фароҳам меорад.

Манбаъ меафзояд, ки давомнокии таҳсил дар бакалавриат 4 сол, магистратура 3 сол ва аспирантура 4 солро ташкил медиҳад.

Ҳамчунин, талабот нисбат ба довталабон чунин аст: шаҳрванди Ҷумҳурии Тоҷикистон,  шиносномаи хориҷии амалкунанда дошта бошад, аз ҷиҳати тиббӣ солим, доғи судӣ надошта бошад ва аз ҷиҳати синну солӣ аз 25 то 45-сола бошад.

Дар ин росто, гуфта мешавад, ки барои қабул ба баъзе ихтисосҳо донистани забони чинӣ талаб карда мешавад. Барои довталабоне, ки забони чиниро намедонанд, таҳсил дар факултети омодагӣ пешбинӣ шудааст.

Муҳлати ниҳоии пешниҳоди ҳуҷҷатҳо барои иштирок дар озмун 20-уми июни соли равон муқаррар гардидааст.

Dialog.tj