Дар Вазорати маориф ва илми Ҷумҳурии Тоҷикистон вохӯрии муовини вазири маориф ва илм, Илҳомуддин Иброҳимзода, намояндагони раёсати таҳсилоти олии касбӣ ва баъдидипломии вазорат, Маркази ҷумҳуриявии таълимию методии назди Вазорати маориф ва илм бо намояндаи ЮНИСЕФ дар Тоҷикистон Эраҷ Содатсайров ва мушовири миллӣ Бибиҷон Умарова баргузор гашт.

Бинобар иттилои маркази матбуоти Вазорати маориф ва илми Ҷумҳурии Тоҷикистон, зимни вохӯрӣ ҷонибҳо масъалаҳои марбут ба рушди минбаъдаи низоми таҳсилоти олии касбӣ дар Ҷумҳурии Тоҷикистон, такмили механизмҳои идоракунӣ ва таъмини сифати таҳсилот, мутобиқ намудани барномаҳои таҳсилотӣ ба талаботи муосир, таҳкими робитаи таҳсилот бо бозори меҳнат ва истифодаи таҷрибаи пешқадами байналмилалиро мавриди баррасӣ қарор доданд.

“Ҳамзамон, оид ба такмили стандартҳои давлатии таҳсилоти олии касбӣ, таҷдиди барнома ва нақшаҳои таълимӣ, рушди низоми кредитии таҳсилот, тавсеаи имкониятҳои таҳсилоти дуалӣ ва модулӣ, баланд бардоштани сатҳи омодагии касбии хатмкунандагон ва тақвияти ҳамкории муассисаҳои таҳсилоти олии касбӣ бо корфармоён мубодилаи афкор сурат гирифт”, - афзудааст манбаъ.

Инчунин, дар рафти мулоқот ба масъалаи омӯзиш ва истифодаи таҷрибаи байналмилалӣ дар самти таҳсилоти олии касбӣ, аз ҷумла, такмили сохтор ва муҳлати барномаҳои таҳсилотӣ, мутобиқати тахассусҳо ба талаботи бозори меҳнат ва таҳкими низоми арзёбии натиҷаҳои таълим таваҷҷуҳи махсус зоҳир гардид.

Dialog.tj