Ҳомид Карзай, раиси ҷумҳури пешини Афғонистон, ки замоне пиёдакунандаи сиёсати Покистон дар ин кишвар буд, гуфтааст, мушкилоти амниятии кунунии Покистон натиҷаи сиёсати чанд даҳсолаи ин кишвар дар пуштибонӣ аз "экстремизм" ва истифодаи он ҳамчун абзори сиёсати хориҷӣ бар зидди Афғонистон мебошад.

Карзай рӯзи сешанбе, 2-уми июн дар саҳифаи корбарии худ дар шабакаи иҷтимоӣ "X" навиштааст, ки Афғонистон аз кишварҳои камшумори минтақа аст, ки дар зиёда аз як асри гузашта равобити дӯстона ва самимӣ бо кишварҳои аврупоӣ дошта, ҳамеша бо ниҳодҳои аврупоӣ ҳамкории созанда кардааст.

Ӯ ҳамчунин, аз кумакҳои башардӯстона ва пуштибонии кишварҳои аврупоӣ аз мардум Афғонистон қадрдонӣ карда, таъкид кардааст, ки беназмиҳо ва мушкилоти кунунии Покистон реша дар сиёсати ин кишвар дар тӯли чор даҳсолаи гузашта нисбат ба Афғонистон дорад.

Раиси ҷумҳури пешини Афғонистон ҳамчунин, аз Кая Каллас, масъули сиёсати хориҷӣ ва амнияти Иттиҳоди Аврупо, хостааст, ки дар баррасии таҳаввулоти минтақа, омилҳои аслӣ ва решаҳои буҳронҳои кунунии онро бо назардошти воқеияти мавҷуд арзёбӣ кунад.

Карзай афзудааст, ки Афғонистон ва мардумаш қурбонии терроризм ҳастанд, ки дар натиҷаи сиёсати Покистон ба вуҷуд омадааст ва дар солҳои гузашта боиси талафоти густурдаи инсонӣ ва вайроншавии инфрасохтор ва муассисаҳои умумӣ дар кишвар шудааст.

Из изҳоротро Ҳомид Карзай дар ҳоле матраҳ кардааст, ки дар замони дар қудрат буданаш дар Афғонистон худ низ сиёсатҳои Покистонро ҷонибдорӣ кардааст.

Dialog.TJ